Fermandariya Têkiliyên Derve ya Hevbendiya Niştimanî ya Hêzên Şoreş û Rikberiya Sûrî, roja Sêşemê civîneke awarte li dar xist û têde biryar da ku dest bi hilmetekê di nav dewletên Ereb û yên biyanî de bike, da ku piştgiriyê ji parêzgeha Idlibê re peyda bike, û bumbebarana li ser wê rawestîne.
Li gor encamên wê civînê roja çarşemê dê serokê fermandariyê Ebdulehed Sitîfo li gel berpirsên Yekîtîya Uropa li Belcîka bicive, û name û doseyên yasayî yên ku Hevbendiya Niştimanî li ser rewşa Idlibê amade kiribûn li gel belgeyên binpêkirinên mirovî yên artêşa Rûsî û ya rêjîma Sûrî li wê deverê pêkanîbûn ji Uropiyan re pêşkêş bike.
Di heman rojê de cîgira serokê Hevbendiyê, Dîma Mûsa, wê li gel berpirsên Netewên Yekbûyî û yên Emerîkî li bajarê New Yourkê bicive, û wan agedarî rewşa parêzgeha Idlibê bike, û wan li himber berpisyariya wan deyne, derbarê biryarên Netewên Yekbûyî yên ku rawestandina şer û parastina sivîlan beşek ji wan in.
Derbarê heman mijarê , roja Înê, dê şandek bi serokatiya Emîndarê giştî yê Hevbendiyê Ebdulbast Ebdulletîf serdana Parîs paytexta Ferensa bike, da daxwazê ji berpirsên wî welatî bike, ji bo biryarên siyasî û mirovî derbarê Idlibê ragihînin, û di heman hilmetê de, dê şanda Hevbendiyê serdana Berlîn paytexta Elmaniya bike.
Fermandariya têkiliyên derve ya Hevbendiya Niştimanî ya Hêzên Şoreş û Rikberiya Sûrî, tekzî li ser rawestana aliyên Navdewletî li himber berpirsayetiya wan derbarê rewşa mirovî li parêzgeha Idlibê kir.
Jêder: Ofîsa Ragihandinê ya Hevbendiya Niştimanî ya Sûrî
