Nûnerê Hevbendiya Niştimanî ya Sûrî li Fransa û endamê Desteya Giştî, Dr. Munzir Maxos, got ku wî çend civîn bi çalakvanên sûrî re lidar xistine, bi armanxa diristkirina databaseke berfireh ya taybet bi kêmendam û birîndaran, tevî sêwiyên ji encama şerê li Sûriyê.
Wî bal kişand ku wan mekanîzmayên avakirina vê databasê û pirsgirêkên bêne pêşiya proje gotûbêj kirin, û got ku ew ji bo pêkanîna hevdîtin û têkiliyên din bi saziyên navxwe û navnetewî re bi mebesta damezrandina wê dixebite.
Û diyar kir ku wî daxwaza alîkariyê kiriye ji bo bidestxistina serjimêriyan ji gelek saziyên Sûrî û navnetewî, herweha ji Hikûmata Demî ya Sûrî û Yekîneya Kordînasyona Piştgiriyê, û tekez kir ku heta niha gelek astengiyên cidî hene di riya wergirtina nav û amarên kêmendam û sêwiyan de.
Maxos da zanîn ku damezrandina databasê dê erênî be ji bo prosesa wergirtina piştevaniya dezgehên pispor û komeleyên navdewletî, herwisa wê bibe alîkar ji bo pêşkêşkirina alîkariyan ji bo vî beşê giring ê civakê, nemaze li ser asta jiyana rojane, da bikaribin tevlî civakê bibin.
Wî tekez kir ku kesên kêmendam, birîndar û sêwî, şahidên zindî ne li ser tawanên rejîma Esed yên berdewam li dijî sivîlan, nemaze bombebarana navendên bijîşkî, dibistan û bazaran.
Tê zanîn ku Hevbendiya Niştimanî ya hêzên şoreş û rikberiya Sûriyê, daxwaz ji nûnerên birîndaran û kêmendaman kiribû ji bo beşdariya civînên Civata Giştî ên xula asayî ya 47’ê bibin, ya ku li dawiya tebaxa borî hatibû lidarxistin, û tekez kir ku pêwîst e tawanbarên tawanên şer li Sûriyê bên dadgehkirin.
Jêder: Ofîsa Ragihandina Hevbendiya Niştimanî Sûrî
