Endamê desteya siyasî ya Hevbendiya Niştimanî ya Sûrî Mihemed Qeddah, berdewamiya revandina zarokan ji aliyê milîsên PYDê yên terorîst ve û leşkerkirina wan bi darê zorê şermezar kir.
Qedda di daxuyaniyeke çapemeniyê de piştrast kir ku ev milîs, tevî îdiayên wan ên rawestandina leşkerkirina zarokan, di pêkanîna binpêkirinan de berdewam in, zarokan ji xwendina wan dûr û bêpar dikin, wan dişînin leşkergehên xwe û perwerdehiya leşkerî û bîrdozî bi wan dikin.
Wî bal kişand ser pêwîstiya avêtina gavin navneteweyî yên cidî li hember milîsên PYD`ê yên terorîst ên ku rewşek taybet li bakurê rojhilatê Sûriyê ferz dikin, û dibe sedema qeyranan û pêlên nû yên penaberan ji Sûriyê.
Malpera ARK News`ê ragihand ku çekdarên PYD`ê berî du rojan zaroka bi navê Semîra Elî Moro ya ji dayîkbûya 15.12.2010`an li gundê Bîr Crûd ê li gundewarê Kobanî revandine. Malbata zarokê çarenivîsa wê ji wan milîsan pirsîn, ew mukur hatin ku keça wan li yek ji kampên leşkerkirinê li bajarê Hesekê ye.
Jêder: Dezgeha Ragihandinê ya Hevbendiya Niştimanî Sûrî
