Bîst Saziyên Mafnasî yên Libnanî û navdewletî daxwaza rawestandina helmetên dersînorkirina penaberên Sûrî ji Libnanê berve deverên di bin kontirola rijêma esed de kirin, û dîtin ku dersînorkirina wan pirensîpa ku çênabe penaber bi kotekî bên vegerandin binpê dike, û ku divê dadgehên Libnanî çi dersînorkirina dighê asta vegerandina bi darê zorê qedexe bikin.
Û Saziyan di daxwiyaniyeke hevbeş de, gotin ku divê desthilatên Libnanî dûrî kiryarên ku cudahiyê dixin nav xelkê de herin, û gotinên sivkatiyê bi penaberên Sûrî dikin bikar neynin, û rêzê li prensîbên yasayî bigirin, û tekez bikin ku her kesê ku di bin metirsiya dersînorkirinê de ye, derfeta wî ya dîtina parêzerekî hebe, û karibe bi Komisyona Penaberan re bicive, û berevaniyê di ber mafê xwe yê parastina ji dersînorkirinê li pêşiya dadgehên pispor bike.
Û Saziyên Mafên Mirovan tekez kirin ku Artêşa Libnanî vê dawiyê bi sedan Sûrî ber bi welatê wan de dersînor kirine, û li wir rûbirûyê metirsiya çewsandin û îşkencekirinê dibin, û cext kirin ku “Ti bihane nîne ku bi sedên mêr, jin û zarokan bi zorê ji nav nivînên wan di katijmêrên sibehê de bên derxistin, û radestî hikûmeta ku jê reviyane bibin”.
Û di daxwiyaniya Saziyan de hat ku “Desthilatên Libnanê bi mebest krîza aborî ya li welêt bi xerabî bi rê ve birin, û ew yek bû sedem ku bi milyonan kes hejar bibin û ji mafên xwe bêpar bimînin, lêbelê, li şûna ku bi çaksazîkirina pêwîst rabin, desthilatan bi zanebûn penaber weke qurbaniyan bikar anîn, da ku têkçûna xwe veşêrin.
Û Saziyan got ku “gurbûna axaftinên li dijî penaberan ya ku beşeke mezin jê xwe dispêre zanyariyên ne rast, dibe sedema tundî û cudakariya li dijî penaberan, lewra divê medyakar û kesayetên siyasî mafên hemû kesên li Libnanê dijîn tevî penaberan biparêzin, ne ku handanê ji bo bikaranîna tundiyê li dijî wan bikin”.
Û daxwiyaniya Saziyan amaje bi wê yekê kir ku Artêşa Libnanî girtina ser malên penaberên Sûrî li taxên seranserê Libnanê pêk anîn, di nav de li “Cebel Libnan, Cûniye, Qub Ilyas û Burc Hemûd”, û piştre piraniya wan yekser dersînor kirin, û gelek ji yên ku bi zorê hatine vegerandin, tomarkirî ne yan jî ji aliyê Komîseriya Bilind a Penaberan a Netewên Yekbûyî ve naskirî ne.
Jêder: Ofîsa Ragihandinê ya Hevbendiya Niştimanî ya Sûrî
