Serokê Hevbendiya Niştimanî ya Sûrî Hadî Elbehra û Serokê Desteya Danûstandinê ya Sûrî Bedir Cemûs û Serokê Hikûmeta Sûrî ya Demkî Ebdilrihman Mustefa û Emîndarê Giştî yê Encûmena Êl û Eşîrên Sûrî Cîhad Mer’î, li gel nûnerên saziyên sivîl, siyasî û xizmetguzarî, êl û eşîr û partiyên siyasî li bajarê Rihayê yê Tirkiyê roja sêşema bûrî civiyan, û li ser pêşhatên dawîn ên rewşa meydanî û siyasî li Sûriyê axivîn.
Û di civînê de hejmarek endamên Hevbendiya Niştimanî û Wezîrên Hikûmeta Sûrî ya Demkî û endamin ji Encûmena êl û Eşîran û Kombenda Kurdên Serbixwe û nûnerên çend partiyên Sûrî amade bûn.
Û Serokê Hevbendiya Niştimanî kurteşiroveyek li ser rewşa siyasî û destkeftên qonaxa bê pêşkêş kir, û li ser plana karê Hevbendiyê di dema bê de axivî, û bal kişand ser hevrêziya tam di navbera saziyên şoreş û rikberiyê de, bi nûneratiya Hevbendiyê û Desteya Danustandinê û Hikûmeta Demkî li gor planeke kar a ku li ser prensîba xebata tevayî û pêwîstiya beşdariya hemû kesên dikarin û dixwazin beşdariyê bikin ji rêxistin û komele û xwedan ezmûn ava bûye, ji bo çakkirina ketwarê jiyanê li bakurê Sûriyê û biserxistina plana ku wek temamkirin ji tiştê ku Hikûmeta Sûrî ya Demkî di salên bûrî de pê rabûye tê, bi armanca dabînkirina jîngeheke ewle û aram ya ku veberhênanê geş bike û alîkariyê di afrandina derfetên kar de bike, ji bo niştecih karibin li deverên xwe bimînin.
Û Elbehra tekezî li ser giringiya pêşketina deverên rizgarkirî ji bo guhertina ketwarê Sûrî kir, da ev yek bibe alîkar ji bo vegerandina guhdana navdewletî û herêmî bi hêviyên Sûriyan û armancên şoreşê yên ku ji bo wan qurbanî dane, herweha dê piştgiriyê bide piroseya siyasî bo pêkanîna biryarên navdewletî yên ku hêviyên gelê Sûriyê di azadî û rûmet û demoqrasiyê de pêk bînin.
Û Serokê Desteya Danustandinê ya Sûrî Bedir Cemûs, şiroveyek siyasî pêşkêş kir, têde behsa pêşhatên proseya siyasî û giringtirîn hevdîtin û civînên ku Deste di heyama bûrî de pê rabûye, ji bo aktîvkirina proseya siyasî da dosyaya Sûrî û daxwazên gelê wê li ser qada navdewletî zindî bimînin, kir.
Û Cemûs tekezî li ser pêwîstiya yekdestiya şoreşgerên Sûrî û hevrêziya wan ji bo guhertina ketwarê siyasî kir, û amaje kir ku pêwîstîya vê yekê bi başkirina ketwarê deverên rizgarkirî û saziyên xizmetguzariyê heye, ji bo bibe hêzdariyeke rasteqîn û alîkariyê di pêvajoya danûstandinê de bike.
Ji aliyê xwe ve, Serokê Hikûmeta Sûrî ya Demkî Ebdilrihman Mustefa li ser karê Hikûmetê û giringîpêdana wê bi dabînkirina alavên bingehîn ji bo pêkanîna ewlehî û aramiyê bi rêya serxwebûna dadweriyê, û temamkirina tiştê ku Wezareta Berevaniyê dest pê kiriye û pêk aniye ji rêşûnên avakirina saziyên leşkerî bi awayê dirust axivî.
Û Mustefa bal kişand ser ku pêşketin di karê Hikûmeta Demkî de heye, tevî şiyanên wê yên kêm, nemaze di warê vekirina pirojeyên domdar û pêşxistina karê Wezaret û saziyan di hundir rêvebirina sivîl û hikumdariyê de.
Û Emîndarê Encûmena Êl û Eşîrên Sûrî Cîhad Mer’î, şiroveyek li ser rola encûmen û beşdariya wî di bicihanîna pilanan de, û ketwarê debara jiyanê li deverên rizgarkirî, pêşkêş kir.
Û kesên amade pirs derbarê rola Hevbendiya Niştimanî di çareserkirina dozên penaberên Sûrî de li Tirkiyê û dewletên dîtir û karîna dezgeha dadweriyê li deverên rizgarkirî derbarê dadpirsîna kesên ku dijminkarî û binpêkirin pêk anîne kirin, her wiha behsa pêwîstiya piştgiriya Wezareta Berevaniyê di Hikûmeta Sûrî ya Demkî de, ji bo bidawîkirina nakokiyên çekdarî yên navxweyî di rêya polîsên leşkerî û dadweriya leşkerî re kirin.
Û Amadebûyan tekezî li ser pêwîstiya pêkanîna vê pirojeya niştimanî ji tevaya gelê Sûriyê re kirin, ji bo ku derfet ji hemû kesayetî û rêxistinên niştimanî re bên dayîn, da li ser bixebitin û hevkariyê ji bo serkeftina wê bikin.
Jêder: Ofîsa Ragihandinê ya Hevbendiya Niştimanî ya Sûrî
