Serokê Hevbendiya Niştimanî ya Sûrî Hadî El-Behra di destpêka civîna Desteya Giştî ya Hevbendiyê di xuleya wê ya 69emîn a li baregeha hikûmeta demkî ya Sûriyê li gundewarê Helebê li dar ket de, şiroveyek derbarê pêşhatên dosya Sûriyê di warê siyasî û meydanî de pêşkêş kir.
Serokê Hevbendiya Niştimanî behsa pêşhatên siyasî yên dawî di dosya Sûriyê de kir, û amaje bi pêwîstiya bilindkirina giringiya dosya Sûriyê li nav civaka navdewletî kir, bi taybetî li rex welatên çalak û bibandor, ji ber ku ew niha li gorî rêvebirina qeyranê serederiyê bi Sûriyê re dikin, li şûna şopandina siyasetên gihiştina çareseriyeke siyasî ya dibe rê ji bo cîbicîkirina biryarên Encûmena Ewlekariyê yên pêwendîdar, bi taybetî biryara jimare 2254, û got ku pêwîstî bi hewlên zêdetir heye ji bo vegerandina dosyayê bo lîsteya pêşîneyên wan welatan.
El-Behra got: Berdewamiya van siyasetan ji aliyê welatan ve, dê bibe sedema zêdebûna azarên Sûriyan û paşguhkirina hêviyên wan, û dewlet di wê baweriyê de ne ku ew dikarin rewşa xitimandinê ya ku gelê Sûriyê ti carî wê napejirîne bisepînin, û nîşana herî mezin jî serhildana aştiyane ya li Suweydayê ye, ya daxwaza çareseriyê û pêvajoya siyasî û cîbicîkirina biryara jimare 2254 a encûmena asayîşê ya li gor hêvî û daxwazên piraniya şêniyên Sûriyê dike, herweha berdewamiya xitimandinê dibe sedema berdewamiya kirîza aborî û lezkirina ber bi rawestana tam a tevgera aboriyê, ji ber vê yekê eger ev rawestan di proseya siyasî de berdewam bimîne, dê bibe sedema nemana karînên saziyên dewletê.
Serokê Hevbendiyê amaje bi wê yekê jî kir ku yek ji ziyanên herî mezin yên li sûriyê bûne di warê jidestdana insanên wê de ye, wek mînak: ji sedî 70ê karmendên pizîşkî û tenduristiyê li derveyî Sûriyê ne, ku ev yek hevbendiyê datîne ber berpirsyariya vegerandina hêviyê ji Sûriyan re da ku li welatê xwe bimînin, û hewcedarî peydakirina jîngeheke ewle û aram li Bakurê Sûriyê ye.
Serokê Hevbendiyê anî ziman ku bihêzkirina rewatiya Hevbendiya Niştimanî dikare bi riya hebûna wê li navçeyên rizgarkirî pêk were, da hikûmeta demkî ya Sûriyê karibe xizmetguzariyan ji xelkê re pêşkêş bike, bi destxistina ewlehî û aramiyê, vegerandina çerxa aboriyê, çêkirina derfetên kar, afirandina şert û mercên guncaw ji bo veberhênanê di van waran de û dabînkirina ewlehî û dadmendiyê bi rêya dadweriya azad a dadmend û serbixwe.
El-Behra diyar kir ku ji bo mayîna sûriyan li herêmên rizgarkirî, pêwîstî bi afirandina şert û mercên jiyanê, aborî û xizmetguzariyê, peydakirina derfetên xwendinê, peydakirina derfetên kar ji ciwanan re, pêkanîna ewlehî û dadmendiyê li herêmê, û bihêzkirin û temamkirina projeya Artêşa Niştimanî ya li jêr serkirdayetiya Wezareta Berevaniyê di Hikûmeta Demkî ya Sûriyê de heye.
El-Behra behsa serdana xwe ya ji bo çend deverên bakurê Sûriyê kir, û got ku wî li xizmet û xebatên ku encûmenên xwecihî pêşkêş dikin guhdarî kir û bi wan re riyên derbaskirina zehmetî û astengiyan, û giringtirîn pêdiviyên xelkê li Sûriyê gotûbêj kirin.
Û bal kişand ser wê yekê ku daxwaza gelê Sûriyê ya bingehîn di hemû civînên bi rûspiyan û desteyên şoreşgerî û çalakvanan re, kontrolkirina ewlehiyê, kêmkirina bêserûberiyê û avakirina deshilata navendî li herêmên rizgarkirî bûn.
El-Behra anî ziman ku berteka hember pêvajoyên asayîkirina têkiliyan bi rêjîma Esed re, bi riya lidarxistina xwenîşandanên xelkê Siwêdayê bû, pêşî daxwaza baştirkirina rewşa jiyanê dikirin, paş re daxwaza rûxandina rêjîma Esed û pêkanîna veguhêzeke siyasî li Sûriyê li gor biryara 2254 ya Neteweyên Yekbûyî kirin.
Serokê Hevbendiyê bal kişand ser rewşa aware û penaberên Sûriyê, bi taybetî penaberên sûrî yên li Libnanê û binpêkirinên mezin ên dijî wan tên kirin û redkirina wan ya tam ji vegera cem rêjîma Esed re, û nîşan da ku divê kar ji bo peydakirina şert û mercên jiyanê li herêmên rizgarkirî ji bo vegera penaberên ku dixwazin bibe, û bilindkirina asta piştevaniya navdewletî ji bo bakurê Sûriyê ji bo dabînkirina pêdawîstiyên tevaya derbider û koçberkiriyan.
Serokê Hevbendiya Niştimanî ya Sûrî behsa civînên ku di heyama borî de bi hejmarek ji berpirs û dîplomatên navdewletî re derbarê dosya Sûriyê de pêk anîne, da dosya Sûriyê bibe yek ji pêşîneyên welatên kartêker kir.
El-Behra tekez kir ku mijara girtiyan di hemû civînên ku Hevbendiya Niştimanî bi kesayetiyên navdewletî re li dar dixin de heye, û daxwaza fişareke cidî li ser hevalbendên rêjîmê kir ji bo azadkirina bi hezarên girtiyan, yên ku hîn di zindanên rêjîmê de ne, tenê ji ber ku ew xwedî bîrûbaweriyên siyasî ne ku dijberiya rejîma cinayetkar û zalim dikin.
Serokê Hevbendiya Niştimanî Sûrî silav arasteyî miletê Sûrî yê gewre kirin, li ser xweragirî û sebir û rijdbûna wan ji bo pêkanîna armancên xwe û cîbicîkirina hêvî û daxwazên xwe yên rewa di dewleta azadî, dadmendî û yasayê de, tevî hevbendbûna hêzên xerab li dijî wan, û tevî hemû bêhêvkirina navdewletî ji wan re bi dirêjiya 12 salên derbasbûyî.
Jêder: Dezgeha Ragihandinê ya Hevbendiya Niştimanî Sûrî
