Tîma “Hevrêzkarên Bersivdanê” li Sûriyê, tekez kir ku piraniya kampên awareyan li bakurê Sûriyê derdê kêmbûneke mezin di alîkariyên mirovî û yên hawarçûnê de dikişînin, û asta herî nizim ji xizmetguzariyên jiyanê, tenduristî û xwendinê bi dest wan nakeve, û di konên têkçûyî de dijîn.
Ev yek di vekolînekê de ku ji aliyê tîma Hevrêzkarên Bersivdanê ve li ser rastiya alîkariyên mirovî li kampên awareyên bakurê Sûriyê hat diyarkirin, hevdem bi destpêka zivistanê re, ku ew vekolîn li ser 73,484 kesên derbider ên temnên curbecur li bêhtir ji 611 kampên li parêzgeha Idlibê û gundewarê wê her weha gundewarên bakurê Helebê belav bûne pêk hat, û wê vekolînê bêtir ji 33,473 jin û keçên ciwan û 6,332 zarokên keç û law ku 1,273 kes ji wan xwedî pêdiviyên taybet in li xwe girtine.
Lêkolîna Hevrêzkarên Bersivdanê diyar kir ku ji sal û nîvekê zêdetir e tu çalakiyên mirovahî li 22% ji kampên ku di lêkolîn li ser wan hatiye kirin pêk nahatina.
Encamên lêkolînê nîşan dan ku ji %89ê mirovan alîkariyên xwarinê wernagirin, ji %11ê wan jî alîkariyê werdigirin, lê ne bi awayekî berdewam.
Pirsnameyê diyar kir ku zêdetirî 94% ji kesên lêkolîn li ser wan pêk hatiye di nav kampa wan de xalek pizîşkî tune ye, lê tenê %6 ji wan li hundurê kampê an jî li derdora wê bi dûrbûna 500 metreyî xala pizîşkî heye.
Encama lêkolîna Hevrêzkarên Bersivdanê piştrast kir ku %91 ji awareyan av bi awayekî rêkûpêk naghêje wan, her weha awayê avêtina zibala wan jî ne baş e, di dema ku 9% ji wan ew xizmetguzarî bi dijwarî bi dest wan dikeve.
Li ser asta xwendinê, lêkolînê diyar kir ku zêdetir ji 96% ji zarokan dibistan û navendeke xwendinê di kampa wan de nîne, lê yên mayî li navendeke xwendinê ya nêzî kampê dixwînin.
Di encama lêkolînê de hat diyarkirin ku 98% ji kesên ku di rapirsînê de cih digirin, temenê konên wan ên tê de dijîn bidawî bûye, di encama gelek fakteran de, lê yên mayî piraniya wan neçar mane ku konan ji kîsî xwe bikirin.
Azara herî mezin di nava kampan de rêyên çûn û hatina navxweyî ne, ji ber ku lêkolînê diyar kiriye ku 82% ji awareyan behsa nebûna projeyên çaksazkirin û asfaltkirina rêyan û baştirkirina xizmetguzariyên paqijî û baranê kirin, di heman demê de 18% li ser projeyên li kampan pêk hatine axivîn, lê wan jî bi giştî piştrast kir ku ev proje dê bi destpêka barîna baranê re têk biçin, ji ber ku bi awayekî ne baş hatine pêkanîn.
Tîma Hevrêzkarên Bersivdanê tekez kir ku rapora lêkolînê eşkere kiriye ku bersivdana Neteweyên Yekbûyî û rêxistinên mirovî tûşî kêmbûneke darayî ya mezin dibin ku ji destpêka îsal ve 27% derbas nebûye, ku karîna wan a dabînkirina tevya hewcedariyên derbideran sînordar dike.
Tîmê tekez kir ku kambaxbûna tunebûna xizmetguzariyên tenduristiyê li kampan, metirsiya belavbûna nexweşiyên vegir peyda dike, nemaze di nav zarok û kal û pîran de, ligel kêmbûna ava paqij, ku peydakirina ava paqij û kazînên avrêjiyê yek ji mezintirîn kêşeyên li kampan e di dema zêdebûna hejmara niştecihên kampan.
Tîma Hevrêzkarên Bersivdanê li ser şert û mercên nebaş ên xaniyan axivî, ji ber ku gelek kesên bêwar di konên têkçûyî de dijîn, ku jiyana malbatan dixe ber metirsiya keş û hewayê û nexweşiyan, û her weha encamên neyînî yên derûnî û tenduristî ji ber şert û mercên dijwar derdikevin.
Duh, duşemê, Hevbendiya Niştimanî ya Sûrî hişyarî ji bobelateke mirovî ya nêzîk da ji ber kêmbûna berdewam a alîkariyên mirovî, û kêmbûna rêjeya welatên ku sozên xwe yên alîkariyan bicih tînin, û zêdebûna hejmara derbideran ber bi deverên rizgarkirî de, bi taybetî bi nêzîkbûna demsala zivistanê re, û daxwaz ji civaka navdewletî kir ku bi lez sozên xwe bicîh bîne, ji ber ku rêjeya hejarî û birçîbûnê digihêje asta herî bilind.
Emîndarê Giştî yê Hevbendiya Niştimanî Heysem Rehma got ku hejmareke mezin ji kampên awareyên Sûriyê hene, pêwîstiya wan bi çaksazkirinê heye, û ew nikarin xwe li ber şap û bahozan bigirin, herweha got ku weke her sal, vê dawiyê jî helmetên leşkerî yên rêjîma Esed û hevalbendên wê dijî navçeyên rizgarkirî zêde bûn, û bûn sedema derbiderbûna xelkê û êş azarên wan bêhtir kirin û barên NY û saziyên wê giran kirin.
Jêder: Ofîsa Ragihandinê ya Hevbendiya Niştimanî ya Sûrî
