Hatina girûpên xwepêşanderan ên ji gund û herêmên Suweydayê, di roja sêyemîn a greva giştî de, ber bi Meydana El-Seer/El-Kerame ya li navenda parêzgehê berdewam e, û dirûşmên “Gel hilweşîna rijêmê dixwaze” bajarê Suweydayê hejand.
Xwepêşanderan pankartên ku derbirîna daxwazên gel dikin bilind kirin. Li ser hinekan nivîsandibûn: “(Em dixwazin biryara 2254 di zûtirîn dem de cîbicî bibe), (Heta stemkarî hilweşe, raperîn berdewam e), (Rûsya, Îran û Amerîka dest ji xaka me berdin)” û Jinên bajarokê Meleh ê gundewarê Suweyda dirûşmên “Em ne birçî ne, daxwazên me siyasî ne” bilind kirin.
Çalakvanan diyar kirin ku ev sê roj in grev li gelek gundên parêzgeha Suweydayê berdewam e, di nav de gundê Kefr El-Lehf li gundewarê rojavayê Suweydayê, û navendên hikûmetê û rêyên gund hatin girtin, herwiha rêyên sereke yên gundê “El-Ciniye” li bakurê rojhilatê Suweydayê, û gundê “Necran” li gundewarê rojavayê bajêr hatin girtin.
Jêder: Ofîsa Ragihandinê ya Hevbendiya Niştimanî ya Sûrî
