Rêkxistina Bijîşkên bêsînor diyar kir ko dektorên hatine piştgirtin ji hêla wan ve li bajarê Meddaya li Gundewarê Şamê tekez kirine ko pênc kes ji gava ko alîkariyên mirovî yên Netewên Yekbûyî û Xaça sor ya Navdewletî û ya Sûrî piştî nîvroja 11.01.2016an gihiştine Meddaya ji birçîna mirine.
Rêkxistinê di daxuyaniyeke xwe ya nû de doz kir “ko ew kesên hewcedarî çareseriyê ne, bilez bêne derxistin ji ber kêmxwariniyê bandor li wan kiriye, da bêtir qurbanî têk neçin. ”
Rêkxistinê destnîşan kir ko di meha kanûna yekê de 23 nexweş ji birçîna li Meddaya mirine û pênc kes yekşemba buhirî di 10 kanûna dûyem de û du kes roja duşembê 11ê kanûna duyem ko hêj karwanên alîkariyan bi rê de bûn jiyana xwe jidest dane. Û bi mirina 5 kesên nû hejmara qurbaniyên birçîbûnê giha 35 kesan li gora dektorên ko ji rêkxistina Bijîşkên bêsînor piştgirtî ne, li Meddaya jiyana xwe jidest dane.
Ji aliyê xwe ve fermanberê operasiyonan yê Rêkxistina bijîşkên bêsînor “Birês Do Lafîn” matmayî maye li ser rewşa bobelat li Meddaya û got: “hêj nexweş dimirin tev ko du karwanên mirovî yên mezin gihiştine û hin nexweşên Meddaya dibe ko rojekê nemînin. Divê nexweşên ko rewşa wan ya tendiristî ne saxlem be û birçîbûnê ew êşandine yekser ji ji bo çareseriyê derkevin.”
Do Lafîn got: “kî dikare têbigihê ka ta nuha nexweşên kêferata mirin û jiyanê dikin çawa derneketine. Gerek çi astengî li pêşiya wan dernekevin.”
Bang li Rêkxistinên taybetî mijarê kir ko Karwanên alîkariyan derbas bikin û bizavê bikin da bilez xelkên liber mirinê derxînin, karekî mirovî ye û dê jiyana gelek bêgunehan rizgar bikin.
Rêkxistinê bal kêşand ser Bijîşkên ji aliyê wan ve hatine piştgirtin rewşa 18 kesan destnîşan kirine ko divê ji wir derkevin û eger dernekevin ew dê tekez bimirin. Di rojên dahatî de jî dê gelek nexweş hewcedarî derxistinê bibin ji bo çareseriyê di bin çavdêriya taybet de bibînin.
Rêkxistinê bêtir got: “ji hêla teknîkî ve yên ko ji xwarinê bêpar bûne alîkarî û çavdêriya wan dijwar e, û dana çareseriyê ji bo nexweş bê ko pisporî di çareseriya bêxwariniyê de hebe dibe ko zikêşiyê libal nexweşan çê bike.”
Her wiha got giring e rewşên bêtir ziyan dîtine ji aliyê tîmeke bijîşkî bêne çareserkirin û di cihekî guncaw de , hem Rêkxistinê xwest ko Jinên avis û yên zarokên xwe şîr didin ji bin dorpêçê derkevin derve.
Di dawiyê de Do Lafîn asta hişyariyê heta pileyên jor bilind kir û got: “hinek nexweş hewcedarî çareseriyeke lezgîn in, çimkî ew li ber mirinê ne û divê bilez derkevin. Ev rewşa awarte ya nuha ye, û di rojên dahatî de dê çalakiyên bijîşkî yên din tekûz bikin.”
Jêder: Hevbendî
