Nunerê Netewên Yekgirtî yê nû ji bo Sûriyê, Gere Pederson, ev yekem care ji dema destnîşankirina wî de, di serdana xwe de bo Moskovayê tekezî li ser pêdiviya cîbicîkirina biryara Netewên Yekbûyî ya hejmar 2254 û aktivkirina prosesa siyasî û misogerkirina vegera penaberên Sûrî bi awayekî ewle û jixwede ji bo welatê xwe kir.
Pedersen, duhî roja duşemê di hevdîtina xwe de ya ligel Wezîrê Derve yê Rûsyayê Sergey Lavrov, xwest ku ew ligel Rûsyayê kar bike ji bo “Destpêkirina pêvajoya çareseriya siyasî li Sûriyê”.
Pedersen got: Divê “Rûsya û Netewên Yekbûyî bi roleke sereke rabin di vê pêvajoyê de”, û hêviya xwe diyar kir derbarê ku Rûsya û Netewên Yekbûyî li ser binemayên biryara Konseya Ewlekariyê ya Netewên Yekbûyî hejmar 2254″ kar bikin, ji bo destpêkirina pêvajoya siyasî û bicihanîna mercên vegera penaberan û jiyana normal li Sûriyê”.
Ji aliyê xwe ve, Serokê Desteya danûstandinên sûrî, Nesr al-Herîrî bal kişandibû ku derfet bo gihiştina çareseriyeke siyasî li welêt heye, û gotibû: “Niha derfetek heye, ji ber ku niha li bakur- rojhilatê û bakurê Sûriyê agirbestek heye, û herwiha bizavên dijî terorê encamên baş bi dest xistine.”
Hêjayê gotinê ye ku li roja îna borî, Desteya danûstandinên ligel şanderê navnetewî yê nû Pedersen civiyabû û hewldanên dibin ji bo pêşxistina pêvajoya siyasî û berdewamiya pêşniyarên ji bo wê gotûbêj kiribûn.
Desteyê di daxuyaniyekê de amadebûna xwe ji bo berdewamiya têkiliya erênî bi nûnerê navnetewî re dupat kir, wek heman têkildariya ligel herdu nunerên berê, û bal kişand ku ev yek tê di çarçoveya “wendanekirina demên zêdetir” de.
Herwiha tekezî li ser karê di bin sîbera Netewên Yekbûyî de li gor daxuyaniya Cenevre û hemû biryarên navnetewî yên girêdayî bi mijara Sûriyê ve kir, bi taybetî biryara navnetewî 2254, ya ku wek karnameya duristkirina çareseriya siyasî ya li ser hatiye lihevkirin li welatekî ku xelkê wê ji bêtir ji heft salan di trajidyakê de dijîn ji ber şerê rejîmê.
Jêder: Ofîsa Ragihandina Hevbendiya Niştimaniya Sûriyê