Wezareta derve ya Amerîka daxwaza şermezarkirina rijêma Esed û milîsên alîgirên wê ji Encûmena Asayîşa Navdewletî kir, li ser astengkirina wê ji bizavên rêxistinên gihandina keresteyên xwarinê û dermanên serekî bo xelkê dorpêçkirî, û riftara Rijêmê bi “bê rewştî” binav kir, û got ku rêjîm vê yekê dike ji bo neçarkirina xelkê li ser radestkirina xwe.
Wezaretê behsa vê yekê di axaftina xwe ya li ser pirsa Sûriyê de kir, û tekez kir ku nabe behane bêne dîtin ji bo bikaranîna birçîkirina xelkê wek çekekî ji çekên şer û daxwaz ji dewletên encûmena asayîşê û civaka navdewletî kir ji bo rawestandina van binpêkirinên Rijêm ji çend salan ve pêktîne.
Li aliyek din, sikirtêrê giştî yê yekîtiya navdewletî ya rêxistinên Heyva Sor û Xaça Sor, Hac Amado Sî bang ji bo rawestandina şer ji hemû aliyan kir, da rê bête dan bo bizavên rêxistinên navdewletî bo gihandina alîkariyên mirovî bo sivîlên zerermend ji dorpêçkirina dijwar ya ji aliyê Rijêmê û milîsên wê li ser sivîlan.
Û Amado Sî daxwaza dubare-avedankirina jêrxana bajêrvaniyê kir, piştî zêdetir ji şeş salên şer, berî lidarxistina kongirê navdewletî li Biroksilê derbarê avedankirina Sûriyê ku tê çaverêkirin li heftiya bê lidar bikeve.
Ku hêzên Rijêmê û milîsên Îranê çend bajar û bajarokan dorpêç dikin û rê li pêşiya gihandina alîkariyên mirovî ji xelkê dorpêçkirî re girtine, bi armanca neçarkirina wan li ser hiştina xaniyên xwe, wek bûyerên Dareya û Wadî Bereda li gundewarê Şamê û taxa Elwe’er li Himusê li vê dawiyê û çend navçeyên din.
Herwiha rêxistina saxlemiya cîhanî li roja sêşemê daxwaza derbaskirina alîkariyên pêwîst bo xelkê dorpêçkirî yên li Xûta rojhilat ya ku 300 hezar hemwelatî têde dijîn kiribû, û tekez kiribû ku rewşa saxlemiyê li Xûta rojhilat li nêzîk Şama paytext roj bi roj xirabtir dibe.
Îlzabêt Hof nûnera rêxistinê li Sûriyê di daxuyaniyekê de gotibû ku “dem derbas dibe li ser xelkê Xûta rojhilat, û dahatên wan roj bi roj kêm dibin”, piştî sepandina dorpêçkirineka dijwar li ser Xûta rojhilat ji aliyê Rijêmê û milîsên mezhebperest ve.
Li aliyek din, rêxerê karubarê mirovî li Sûriyê Elî Elze’terî hişyarî da derbarê”nêzîkbûna bobelateka mirovî” eger ku bilez alîkarî derbas nebin bo xelkê pêwîstdar li Xûta rojhilat, û Elze’terî daxwaza gihandina alîkariyên mirovî ên bilez bo bajarokên dorpêçkirî kir, ku di wan navçeyan de sivîl rastî tundutîjya rojane dibin û ji keresteyên serekî bêpar dibin.
Jêder: Ofîsa Ragihandina Hevbendiya Niştimanî / Wekalat
