Malbatên Kurd ên ku girtiyên wan li cem DAÎŞê û rêjîma Esed hene, jiyaneke dijwar dijîn ji ber tirsa wan li ser girtiyên wan ên ku çarenûsa wan wendayî ye.
Xelîl Mistefa endamê Xwecihiya Kobanê ya Encumana Niştimanî ya Kurdî ji malpera me re ragihand ku gelek dost û alîgirên ENKSê li cem DAÎŞ û rêjîma Esed ji berî 3ê salan de girtî ne, û em nizanin ku ew sax in an na, û hejmar mezin e ji ber ku bi sedan welatiyên sivîl li ser rêbendan hatine girtin, hin ji wan mamosteyên dibistanan e û hin rojnamevan in, û ta niha çarenûsa wan nediyare.
Ji hêla xwe ve, Bozan Ebdella yek ji welatiyên Kobanê ye, ji me re da xuyakirin û got: “ kurê min ji berî 4 salan de li bajarê Şamê hatiye girtin, her wiha DAÎŞê birayê min tev kurê wî ji berî 3ê salan de li ser riya Heleb – Qamişlo girtin, û çarenûsa wan wendayî ye”.
Ebdella got ku ew di dilnearamiyek giran de dijîn, û ji rêxistinên mafên mirovan xwest ku alîkariya wan bikin da çarenûsa girtiyan zanibin,
Her weha çalakvan Ferhan Mihemed ji me re da xuyakirin ku berî demkê hin gorên komî yên sivîlan li gundewarê bajarê Minbicê hatin dîtin, û guman heye ku ew termên girtiyan bin.
Her wiha di dawiya gotina xwe de, Mihemed daxwaz kir ku aliyên peywendîdar lêkolînê bikin ji bo zanîna nasnameya kesên di wan goran de, da dilê malbatên girtiyan têkeve cî de.
Jêder: Beşê Kurdî ji nivîsgeha Ragihandinê ya Hevbendiya Niştimanî
