Sikirtariya giştî ya ENKS’ê daxuyaniyek şermezarkirinê derxist derbarê revandina Fêsel Yosif endamê desteya serokatiya ENKS’ê û rêxerê giştî yê Tevgera Çaksazî kurdî- Sûriya ji mala wî li Qamişlo ji aliyê milîsên “PYD”ê, û têde daxwaza serbestberdana wî û sercem girtiyên siyasî kir, û ENKS’ê di daxuyaniya xwe de tekez kir ku ewê xebata xwe berdewam bike û ji van kiryaran natirse.
Di daxuyaniyê de hatiye ku ” îro 02.04.2018, milîsên PYD’ê careke din û bi şêwazekî rêbazkirî rabûn bi zêdegaviyekê bi êrîşkirina li ser mala mamoste Fêsel Yosif endamê serokatiya ENKS’ê û rêxerê giştî yê Tevgera Çaksazî kurdî -Sûriya bi sê otombêlên mişt çekdar û ew revandin ber bi cihekî nediyar bi şêwazekî dûr ji tîtal û rewştên kurdayetiyê û dûr ji piransîpên mirovî û bê berçavgirtina rewşa wî ya tenduristî wî, wek hewleke bêhûde ji bo têkşikandina xebat û pirojeya netewî ya ENKS’ê û siyaseta wê ya ji bo dîtina çareseriyeke siyasî ji qeyrana Sûriyê re û bidestxistina mafên netewî yên gelê kurd, hevdem ku ji “PYD”ê tê xwestin ku lêvegerekê ji siyaset û helwestên xwe re çêke, nemaze piştî bobelata Afrînê û herwiha dest ji siyaseta xwe ya takalî û riftarê xwe yên bi darê zorê û zibruzengê sepandine “.
Ji aliyê xwe ve, îro Hevbendiya Niştimanî di daxuyaniyekê de nîgeraniya xwe nîşan da li hember destdirêjiya li ser mala endamê serokatiya ENKS’ê û rêxerê giştî yê Tevgera çaksazî kurdî – Sûriya Fêsel Yosif li Qamişlo û revandina wî ber bi cihekî nediyar de, herwiha gefên milîsên terorîst yên nivîsîkî û vîdiyokirî yên bi kuştina endamê desteya siyasî ya Hevbendiyê Fûad Alîko û Ibrahîm Biro, endamê desteya danustandinan û serokê berê yê ENKS’ê bi sedema helwestên wan yên dijî terorê û desthilata kotekî û piştgiriya wan ji şoreş û azadiya xelkê Sûriyê re.
Hevbendî milîsên PYD’ê berpirsyar dît li hember jiyana mamoste Fêsel, û hevdem li hember her xirabiyekê li dijî her têkoşerekî yan li dijî malbat û hevalên wan yên rûbirû gefxawarinê dibin, ji wan serokê encûmena xwecihiya Afrînê ya ENKS’ê “Ebdulrehman Apo”, û herwiha daxwaza rawestandina piştgiriyê û bersingirtina berdewamiya wan kiryar û tawanan ji aliyên palpiştên wan milîsan kir.
Jêdder: Beşê kurdî ji nivîsgeha ragihandinê ya Hevbendiyê
