22 heyva nîsanê gelê Kurd li seranserî cîhanê roja rojnamegeriya Kurdî vedijîne, ji ber di wê rojê de berî 121 salê yekemîn rojnameya Kurdî hate weşandin.
Rewşa rojnamegeriya kurdî piştî bûrîna 121 salê di ser weşandina yekemîn rojnameyê re gihaye çi astê, û rewşa rojnamevanê kurd gihştiye ku derê. Malpera Hevbendiyê bersiva vê pirsê ji zarê du rojnamevanên Kurd li parêzgeha Hesekê wergirt.
Îvan Hesîp rojnamevanê Kurd û peyamnêrê berê yê Tora Rûdaw diyar kir ku tevlî rojnamegerî li seranserê cîhanê gavên mezin avêtine; lê hîn li Sûriyê û li deverên Kurdî di warekî xerab de ye, û astengiyên mezin li pêşiya wê hene.
Hesîb di daxuyaniya xwe de ji malpera me re ragihand ku li her deverekê ji Sûriyê di bin kontirola hêzekê de ye, ew hêz pîvanên xwe di hemû waran de li ser medyayê feriz dikin.
Di heman mijarê de Leyla Qemer peyamnêra malpera Yekîtî Mîdiya li bajarê Dêrikê got ku Rojnamegerî ne tenê ewe pênûs û çend gotinên li hevhatî, rojnamegerî ewe ku tu karibe imzekê li şûna pênûsa xwe bikole, êşa xelkê bi deng bike û rewşê biguhere, tevî ku kirîza Sûriyê derfetek mezin da ragehandinê , lê mixabin, ragihandina kurdî di rewşeke zehmet re derbas dibe, ji ber her kesî rahiştiye vê alê ji bo berjewendiyên xwe yan aliyekî li ba dike, û ta niha ti yasa tune ku wan rawestîne.
Her weha Qemer got “Em zanin ku rojnamegerî desthilata çaremîn e û gereke roniyê bide ser şaştiyan û civakê saz bike, lê destwerdana desthilatdaran di şêweyên nîvisandinê de dihêle ku ew bê rol bimîne, em ji bîr nekin ku vê rewşa xerab derfet da gelek pênûsên xurt û hêja jî ku bi nivîsên xwe berê gemiyê bidin ronahiyê ,lê hê jî rewşa rojnamegeriyê hewcedarî gelek çav û gav û kedê ye , ta ku pêşbikeve, ji ber hê jî rojnamegeriya kurdî di gavên xwe yên pêşî de ye”.
Tê zanîn ku di 22 Nîsana 1898 yekemîn Rojnameya Kurdî bi navê Kurdistan li paytexta Misrê Qahîra li ser destê Miqdad Bedirxan hate weşandin.
Jêder : Beşê Kurdî ji Nivîsgeha Ragihandinê ya Hevbendiya Niştimanî ya Sûrî
