Raporteke nûçeyan diyar kir ko di cenga rêjîma Beşar û milîtanên biyanî de yên ko Îran piştgiriya wan dike, ziyana herî mezin li zarokan dibe, û got ku sosretên cengê bandora xwe li wan kesên ko ji malên xwe derbider bûne jî kiriye.
Acansa Enadol ya nûçeyan raportek li ser zehmetkêşana miletê Sûrî bi giştî û ya zarokan bi taybetî belav kiriye, tê de destnîşan kiriye ko ew kesên ji malên xwe derbider bûne “qedera wan e ko hişê wan dagirtî be ji dîmenên kuştin û wêraniyê, û wî derdî bi xwe re bibin her derê”.
Raport li ser zarokên Helebê axivî, ew ên ji malên xwe reviyane û bêxwedî mane, piştî taxên wan ketin ber êrîşên rêjîmê û milîtanên wê. Û serbûriyên hin kalemêr û pîrejinên sax mane, û derdên ko dîtine berî ko bigihên sînor û derbasî Tirkiyê bibin bi berfirehî şirove kirine.
Raportê aniye ziman ko tunebûna alavên locistî û turumbêlên servîs yên hindirîn, bû sedema ko gelek sivîl şehîd ketin, çimkî turumbêlên ambulansê nikarîbûn hemû birîndaran ber bi nexweşxanan ve veguhêzin. Raportê destnîşan kir ko rewşa tendiristî ya zarokan gava ko gihan nexweşxaneyên Tirkiyê pir nebaş bû, çimkî gelek tirs û matmayînî û derd di rûyê wan de diyar bûn.
Û ji ber ku hejmareke mezin ji xelkê bi destê hêzên rêjîmê û milîtanên wê hatine kuştin, yek ji penaberên Sûrî yên ko di raportê de axivîne got ku wî ji Malperên Civakî yên Enternetê nas kiriye ko birayê wî û jina xwe û lawikê wan hatine kuştin, ji ber nebûna cih di goristanê de hemû di gorekê de veşartine.
Her weha raportên ko ji rêkxistina Yonîsêv ya bi ser Netewên Yekbûyî ve, yên dûmahiya sala derbasbûyî derketine, tekez kirine ko navbera çar heta heşt milyon zarok anko bêtir ji 80% ji zarokên Sûriyê, ji encama cenga rêjîmê li dijî miletê xwe bandor li wan hatiye kirin. Her weha rêkxistina bi zaroktiyê ve têkildar e, destnîşan kiriye ko dora du milyon zarokên Sûrî yên penaber hewcedarî piştgirî û çareserkirina derûnî ne.
Raportine mafnasiyê yên navdewletî yên din, li gora acansa Enadol, dibêjin ku li dora 8 milyon zarokên Sûrî, çi yên li hundir mane û bi sedema cenga rêjîma Esed û hevalbendên wê ketine ber dorpêçê û tirs û aloziya jiyan dîtine, an çi yên derketine dewletên derdorê, hêj tirs û dîmenên kuştin û wêraniyê di hişê wan de ne.
Jêder: Nivîsgeha Ragihandinê ya Hevbendiya Niştimanî/Acansa Enadol