Rêkxistineke Mafnasiyê tekez kir ko Rûsya ji destpêka têwerdana wê ya leşkerî di Sûriyê de, bêtir ji pênc hezar sivîlên Sûrî kuştine, ji bo nehêle rêjîma Esed ji berî du salan ve birûxe, û diyar kir ko bombebarana Rûsya bû sedema derbiderbûna milyonên sivîan ji encma armanckirina wê ji bargehên tendiristî û yên xizmetkarî re.
Toreya Sûriyê ya mafên mirovan di raporta xwe ya duh yekşemê de anî ziman ko wê kuştina 5233 sivîlî ji nav wan 886 jin û zarok bi destê hêzên Rûsî li Sûriyê ji gava têwerdana wê ya leşkerî de di 30 eylûla 2015, belgeh kirine.
Di raportê de hatiye ko Rûsya ziyanên mirovî û darayî yên mezin kirine, ku gihaye 85% ji herêmên rizgarkirî yên di bin kontrola şoreşgeran de, û rêjeya mayî li herêmên bin kontrola rêkxistina Daiş ya ko li wir jî sivîl ne şervanên wê rêkxistinê ne amanc kirine.
Raportê di belgehkirina xwe de pal daye ser 14 dîdevaniyên ku yekser ji devê dîdevanan hatine wergirtin, û 251 kuştar ko hêzên Rûsî pêkanîne û bi hezaran kuştine belgeh kirine, û anî ziman ko êrîşên Rûsî bûn sedema derbiderbûna 2.2 milyon kes bi kêmanî, yên ko ji ber bombebaran û wêrankirinê reviyane.
Her weha raportê nekêmî 707 bûyerên zêdegaviyên Rûsî li ser navendên zindîdar yên sivîl tomer kirine, ji wan jî 109 mizgeft û 143 navendên perwerdeyê û 119 bargehên bijîşkî hatine armanckirin, û 47 kes ji kadiroyên bijîşkî kuştine,8 jin di nav wan de hene, û 24 ji kadirên Berevaniya sivîl û 16 ji kadirên ragihandinê jî kuştine.
Toreyê di raporta xwe de diyar kir ko hêzên Rûsî bombeyên goşî nekêmî 212 caran bikar anîne, piraniya wan li ser parêzgeha Idlibê ne, her weha bombeyên sotandinê bêtir ji 105 caran bi kar anîne û piraniya wan li ser bajarê Helebê bûn.
Toreya mafnasiyê Rûsya bi bestina peymanên ku bûn sedema koçkirina neçarî tawanbar kir, di dema ku wê peyman û lihevhatin çêdikirin û wê bi xwe çavdêriya wan wek aliyekî dabînker dikir , wek peymana koçberkirina taxên rojhilat ji bajarê Helebê û taxa Elwe’r li Humsê di adara 2017.
Toreyê di raporta xwe de tekez kir ko “ bêguman e, Rûsya biryarên encûmena ewlekariyê ya hejmar 2139 û ya 2254 yên derbarê qedexekirina bombebarana bêserûber binpê kirine, û bi wê tawankariya kuştina bi mebest madeya 8an ji yasaya Roma ya bingehîn binpê kiriye, ji lewra ew wek tawanên cengê tên dîtin. ”
Toreyê di dawiya raporta xwe de daxwaz ji encûmena ewlekariyê kir ko pêrabûnin din bike, piştî derçûna biryara hejmar 2254 ya ko aşkere dibêje: “çi êrîşên li dijî sivîlan û deverên sivîl divê yekser bên rawestandin, ji wan jî êrîşên li ser bargehên bijîşkî û karmendên biwara bijîşkî, û her weha rawestandina bêserûberiya bikaranîna çekan tevlî bombebarandina topan û êrîşên asmanî. ”
Jêder: Nivîsgeha Ragihandinê ya Hevbendiya Niştimanî
