Roja pêncşembê 02.02.2017an kargeha rahênanê ya ko serpereşt û berpirsiyarên partiyên Kurdî yên Encûmena Niştimanî Kurdî lê amade bûn bidawî hat, ew kargeh li ser kartêkerina beşdarbûnê di avakirina dîmuqratiyetê de û çareserkirina nakokiyan û pêkanîna aştiyê bû, û kargeh bi çavdêriya rêkxistina PAO û rêkxistina AID pêkhat.
Kargeh sê rojên li pey hev berdewam kir, têde mafên mirovan û dijatiyên cengê û rewşa aştiyê û çawaniya çareserkirina nakokiyan û navgînî û danûstandin, şirove û gengeşe kirin.
Û du kesayetiyên siyasetmedar, Dr. Fûad Hisên serokê dîwana serokatiya herêma Kurdistanê, û mamoste Ednan Elmiftî serokê Perlemana Herêma Kurdistanê yê berê mêvanên kargehê bûn, û ev herdu siyasetmedar di danûstandinên herêma Kurdistanê de yên di navbera Partiya Dîmuqratî Kurdistanî û Yekîtî Niştimanî Kurdistan de amade bûn.
Mamoste Ednan Elmiftî li ser dijatiyên ko li herêma Kurdistanê çêbûne axivî, her weha li ser çawaniya bandora wan li ser parçeyên Kurdistê yên din û sedem û fakterên ko hiştin ew hevrikî çêbibin, û diyar kir ku rola wan di dîtina çareseriyan de hebû, her weha di nehêlana xwînrijînê di navbera Kurdan de û amadekirina seqayên hevgihiştinê û danîna mercên ko yê danûstandinê bike divê li gora wan mercan be.
Dr. Fûad Hisên jî li ser qonaxên ko herêma Kurdistanê tê re buhûrî û çawaniya danîna peywendiyan bi dewletên cîran û Emerîka û dewletên Ewropî re axivî, û diyar kir ko herêma Kurdistanê berê ji hêla cografiyayê de ji çar aliyan ve dorpêçkirî bû.
Û li ser yekrêziya Kurdan li Sûriyê û dîtina çareseriyan ji bo hevtêgihanê û lihevkirinê û vegera li peymanên imzekirî û dîtina kesayetiyên siyasî axivî, ko bi rola danûstandinê di navbera tevgera Kurdî de li Sûriyê rabin, û danîna peywendiyên navdewletî tako mafên miletê Kurd li Sûriyê bidest bixînin.
Tê zanîn ko bêtir ji 20 kesên serpereşt û berpirsiyayên partiyên Encûmena Niştimanî Kurdî seredana herêma Kurdistanê kiribûn tako hevdîtin û civînan bikin, her weha serokê herêma Kurdistanê birêz Mesûd Barzanî pêşwaziya wan kir.
Jêder: Beşê kurdî ji Nivîsgeha Ragihandina Hevbendiyê
