Toreya Sûriyê ya mafên mirovan di raporteke xwe de duhî yekşembê bi helkefta ‘’ Roja cîhanî ya têkbirina tundûtûjiya li dijî jinê‘’ diyar kir ku bêtir ji 27hezar jin li Sûriyê ji adara 2011ê destpêka şoreşê ve piraniya wan bi destê hêzên rêjîmê hatine kuştin.
Toreyê di raporta xwe ya salane ya bi navê ‘’derdkêşiya jinên Sûriyê welat parçe dike û civakê derbider dike ‘’ de anî ziman ko wê kuştina 27hezar û 226 jinan ji destpêka adara 2011ê ve belgeh kiriye, ji vê hejmarê 11,889 keçên biçûk in û 15,337 jinên gihiştî ne.
Toreyê destnîşan kir ko ‘’rêjîma Esed 21573 jin û qîz kuştine, her weha 1231 bi destê hêzên Rûsya hatine kuştin û hêzên hevpeymana navdewletî 926 kuştine, her weha 1301 jin û qîz bi destê aliyin din hatine kuştin. ‘’
Raporta toreyê bêtir anî ziman ko 922 jin û qîz bi destê rêkxistinên tundrew hatine kuştin, ji nav wan 844 bi destê Daiş û 78 bi destê Desteya tehrîr Eşam û 220 bi destê milîtanên PYD û 1053 bi destê aliyên nediyar hatine kuştin.
Raportê bal kişand ser ku 89 jin bi işkenceyê hatine kuştin, 71 ji wan di zindanên Esed de û 14 di zindanên Daiş de û 2 di zindanên milîtanên PYD de û yek di zindanên alayan de hatine kuştin.
Raportê di temîniyên xwe de ji dewletên Ewropî û Yekîtiya Ewropî xwest ko sizayên abûrî li ser Îranê û Rûsya bêtir bikin, çimkî ew piştgiriya rêjîmê dikin, her weha alîkarî bo rêkxistinên civaka sivîl yên kartêker bibin ji bo karibin dîsa qurbaniyan di civakê de kartêker bikin.
Toreyê ji hevpeymana navdewletî ya li dijî Daişê daxwaz kir ko vekolînê di kuştina jin û qîzan bi taybetî yên li Sûriyê de bike, her weha daxwaza xistina fişaran li ser milîtanên PYD kir, ko pirosesa leşkerkirina keçên biçûk û operasiyonên revandin û girtinê rawestînin.
Jêder: Ofêsa Ragehandinê ya Hevbendiya Niştimanî