Îro roja duşemê 26/10/2015 û li demjimêr çarê piştî nîvro û li ser vexwendina Encûmena Xwecihî ya ENKSê, bi sedan kes ji xelkê bajarokê Girkê Legê xwepêşandanek li navenda bajêr li dar xistin, ji bo şermezarkirina kiryarên PYD yên zordarî, û nemaze derbarê sepandina îdiyolojiya xwe ya takerê û bi taybetî li ser şagirdên kurd, û di xwepêşandanê de Hesen Salih endamê ENKSê li pêşberî xwepêşandêran gotarek pêşkêş kir û têde kiryarên PYDê şermezar kirin, û diyar kir ku ew ligel piransîpên demokrasiyê û mafên gelê kurd naguncin, û herwiha bûne sedema koçberkirina xelkê navçeyê û valekirina wê ji nişteciyên kurd, û Salih cext li ser wê yekê kir ku Şoreşa Sûrî li dijî dîktatoriyê û li dijî takerewiyê rabû, lewra bi hîç şêweyî wê her desthilateka takerewiya din nehête qebûl kirin.
Serokê xwecihiya Girkê Legê Çinar Mer’ê ji malpera me re got: ” em ne li dijî fêrkirina zimanê kurdî ne lê ne bi vî awayê niha, ji ber ku rêbazên xweseriya PYDê ne ji aliyê pisporan ve hatine amadekirin, tevî rakirina zimanê Engilêzî”.
Herwiha Çinar bal kişand ku Rêveberiya Xweser ku PYDê ragihandiye nerewa ye û kiryarên wê bi devê tivingê têne sepandin û bi razîbûna rêjîmê”.
Hêjayî gotinê ye ku cîgirê serokê Hevendiya Niştimanî Mistefa Oso di daxuyaniyek pêştir de tekez kiribû ku “rêjîma Esed sûdmentirîn alî ye ji riftarên nedirêde yên PYDê , û mezintirîn ziyan li gelê kurd dibe, ji ber ku kiryarên wê nakokiyan di navbera pêkhateyên gelê Sûriyê de zêdetir dikin, û bargiraniya van riftaran bi neheqî têxe stûyê miletê kurd”.
Jêder: Hevbendî
