Rêkxistinên mafnasiyê kirdeyên hin aliyên Libnanî yên bi Esed re hevkar in pirotesto kirin, ko fişarê didin ser penaberên Sûrî li Libnanê bi amanca ko wan bi kotekî ji Libnanê derxînin, û ev tişt jiyana wan dike metirsiyê, bi taybetî rêjîma Esed hêj tawanên cengê derheqê sivîlan de pêk tîne.
Desteya Zanyarên Misilmanan ya Libanê di daxuyaniyeke xwe de radestkirina derbiderên Sûrî ji rêjîma Esed re ji aliyê hin aliyên Libnanî pirotesto kir, û got ku ew li dijî zanyariyên hemî olan û yasa û peymanên navdewletî ye.
Desteyê di daxuyaniya xwe de ya li jêr navê ‘’na, ji tawana radestkirina kesên bi rûmet bo kujerê wan re’’, û destnîşan kir ko radestkirina penaberên Sûrî li dijî sincên mirovî û cîrantiya baş û alîkariya bêkesan e, û dê desthilata Libnanê li pêşberî civaka navdewletî têke ber lêpirsîna yasayî , û dibe jî ji alîkariyên mirovî bêpar bibe.
Daxuyaniya Desteyê hat piştî ko pêzanîn hene ko aliyin Libnanî penaberine Sûrî radestî rêjîma Esed kirine, ko wan biryara Encûmena Berevaniyê ya Bilind ya ko dibêje : Çi Sûriyê ko bi qaçaxî piştî heyva çarê ya vê salê derbasî Libnanê bûye wan vegerînin, delîve kirine, wan jî hin penaberên ko bi salan li Libnan in radestî rêjîmê kirine.
Daxuyaniyê hişyarî da û got: Di dema zincîra kirdeyên li dijî penaberên Sûrî wek radestkirina wan bo kujerê wan, rûxandina çadirên wan, biserdegirtina bêserûber ji cihê daniştina wan re, birçîkirin û riswakirina wan, girtina wan bi behnayine vala, standina bacê ji wan û tengkirina jiyana wan, û kampaniyên nijadperestî ji hin berpirsiyaran, em ditirsin ev gelaciyeke mezin ya ko tu kes wê naxwaze çêbike.
Deste dibîne ko radestkirina van kesan bo kujerê wan û êşkencekirin û dardakirina wan, beşdarbûn e di tawanê de, ko behaneya wan biryara Encûmena Berevaniya Bilind e ji bo xizmeta Esed bikin.
Desteya Zanyarên Misilmanan, bal kêşand ser ko yên li himber berdana penaberan bêdeng in, ew jî mîna yên ko wan radestî rêjîmê dikin, hemû di tawanê de beşdar in, û ji rêkxistinên mirovî û yên mafnasiyê yên navdewletî û yên xwecihî daxwaz kir ko bi perpirsiyariya xwe rabin û zû tevbigerin bo tawanê rawestînin.
Ji aliyê dî ve, Hevbendiya Niştimanî ya Hêzên Şoreşê û Rikberiya Sûriyê dibîne ko yên di vegerandina û radestkirina Sûriyên li Libnanê beşdar dibin , dê berpirsiyariyê li pêşberî dadgehên navdewletî hilgirin, û Hevbendiyê tekez kir ku ew dê berê xwe bide dadgehan li gora yasayên navdewletî yên ko mafên penaberan diparêzin.
Jêder: Ofêsa Ragehandinê ya Hevbendiya Niştimanî
