Karsparteya Bilind Ya Penaberan ya bi ser Netewên Yekbûyî ve daxwaza çareserkirinek lezgîn ji rewşa penaberên Sûrî re kir, ewên ji nîveka nîsana borî de di rewşeke xerab de ne, ji ber ku li ser sînorê navbera du dewletên Erebî asê mane û herdu jî pêşwaziyan wan nakin.
Karsparteyê di daxuyaniya xwe de daxwaza“dabînkirina bilez ji rêbuhêrkeke aram re kir” ji bo vê koma ko ji 41 penaberên Sûrî pêk tê, yên ko ji zordariya rêjîma Esed reviyane û ew nuha di rewşeke pir xerab de di nabera herdu welatan de dijîn.
Karsparteyê daxwaz ji Cezayir û Mexrib kir ko “bi hev re bixebitin tako çarakê ji vê rewşa metirsîdar ya nayê pejirandin re bibînin, ya ku penaberên Sûrî yên ko di navbera herdu sînoran de asê mane têde dijîn”.
Li gora daxuyaniyê zarok û jinên ducanî jî di nav vê komê de hene, û hin jin ji wan hewcedarî operasiyonên qeyserî ne, û hêj ev kom li biyabanekî tije tûpişk û mar in asê mane.
Daxuyaniya Karsparteyê bêtir got ku “Cezayir û Mexrib herdu jî dibêjin ev kom ji derveyî sînorê welatê me ne”, û daxwaz kir ko pêrabûnan bikin tako vê komê biparêzin, û got ku ew amade ye bo navgînî û hevrêzkariyê di operasiyona derkirina penaberên Sûrî yên ko li ser sînorê herdu dewletan rê li ber wan hatine girtin bike.
Berê jî rêkxistinên Mexribî û Cezayirî yên berevaniya mafên mirovan dikin ew rewşa bobelat ya penaberên Sûrî yên li navbera herdu dewleta asê mane pirotesto kirine, û nerazîbûna xwe ji wê rewşa bobelatî ya ko malbatên Sûrî tê de dijîn diyar kirine.
Tê zanîn ku dora 8 malbatên Sûrî tevlî zarok û jin û nexweşan ji mehekê ve li biyabana navbera sînorê Mexrib û Cezayirê dijîn, li gora dîdeya takekesin ji penaberên asêbûyî ko dezgehên ragihandinê digel wan peyivîne.
Jêder: Nivîsgeha Ragihandinê ya Hevbendiya Niştimanî/Acans
