Encûmena Ewlekariya Navdewletî duhî roja duşemê di civîneka nefermî de li ser daxwaza heryek ji Birêtaniya û Firinsa û Niyozîland û Okraniya û bi beşdariya nûnerên rêxistinên mirovî û yên nemîrî ji bona gengeşekirina qeyrana sivîlên Helebê yên dorpêçkirî, hişyarî da der barê metirsiyên bikaranîna kirîdorên aram li Helebê yên Rûsiya behsa wan dike.
Û piraniya endamên Encûmenê û beşdarên civînê, hişyarî dan der barê metirsiyên berdewamiya bikaranîna wan kirîdoran ji aliyê Rûsiya ve, û hin beşderan û di nav wan de nûnerê Eribistana Si’ûdî li NY, Ebdulah Elmu’elimî ew bi “kerîdorên mirinê” binav kirin.
Li aliyek din, Saminsa Bawer, balyoza Amerîka li NY, daxwaz ji Rûsiya kir, ku ” dorpêçkirinê li sivîlên Helebê neke, û bikaranîna derdeseriyên sivîlan wek kaxeteka bazara siyasî yan wek tektîka şeran rawestîne”, herwiha daxwaza bidawîkirina dorpêçkirina Helebê û vejandina rêkeftina rawestandina karên dijminkariyê kir.
Bawer di bersiva xwe de got ku “li şûna Rûsiya û Rêjîm bi vemirandina agirê tundutîjiyê û peydakirina zemînekê bo pêvajoya siyasî rabin, berdewam û dubare bi êrîşkirina girûpên rikberiyê û birîna riya kastîlo radibin, ya ko dawîtirîn rêya gihandina alîkariyên mirovî û tevgera bazirganiyê bo Helebê ye”.
Ehmed Remezan, endamê Hevbendiya Niştimanî ya Sûriyê, demek pêştir de tekez kiribû ku di Helebê de, “hîç kerîdor binavê kerîdorên mirovî nînin, ku ew kirîdorên Rûsiya behsa wan dike, xelkê Helebê wan bi “kirîdorên mirinê” binav dikin, û got ku opozisyona Sûriyê, “ragihandina Rûsiya bi tawana şer û ya dijemirov pesind dike”, û amaje da li ser hebûna “pîlanekê ji bona koçbarkirina xelkê bajêr, bi beşdariya firokên Rûsiya û pasdarên Îranê”.
Jêder: Hevbendî + Wekalat
