Wezîrê derve yê Ferensî Can Mark Ayirlot ragihand ko wezîrên derve yên “Koma Heft Dewletên Pîşesaz” lihev kirin ko ew tekeziyê li ser wê yekê dikin ku çi çareserî li Sûriyê nîn e eger serekê rêjîmê Beşar Elesed di desthilatê de be.
Ayirlot di kongirê rojnamevanî de doh got ku beşdaran tevan di civîna Koma Heftan de, û bi hevdîtina berfireh li gel dewletên Erebî û di serî de Siûdiyê û Îmarat û Qeter û Urdun û Tirkiya gotin ko “çi paşeroj ji Sûriyê re bi hebûna Beşar Elesed nîn e.”
Wezîrê derve yê Emerîkî Reks Tillerson di civînê de got: Emerîka dibîne ku ti cihê Beşar Elesed di çareseriya jibo aştiyê li Sûriyê nîn e.
Wezîrê derve yê Elmanî Sîgmar Gabriyal di dûmahiya civîna berfireh de got :”em dixwazin bihêlin Rûsya jî piştgiriya çareseriya siyasî li Sûriyê bike”, û tekez kir ko welatê wî piştgiriya helwesta wezîrê Emerîkî Tillerson dike.
Her weha Birîtanya û Keneda gotin ku dibe siza li ser Mosko xurtir bibin, eger piştgiriya rêjîma Esed berdewam bike, berê jî Tiramp bi şêwirdara Elmanî Encêla Mêrkil re li ser derba Emerîkî ya hefteya buhûrî axivîbû, û spasiya wê kir li ser piştgiriya wê ji lêdana bingeheke asmanî ya rêjîmê re.
Koma Heftan (Emerîka, Elmanya, Yaban, Birîtanya, Keneda, Firensa û Îtalya), di civîna xwe de ya li Îtalya li dar ket, xwestin bêtir bizavên diblomasî bibin da çareserkirineke aştiyane ya herdemî pêk bê, Tîlirson di civînê de got :”em bi hêvî ne ko Beşar ne parek ji wê paşerojê be”.
Jêder: Nivîsgeha Ragihandinê ya Hevbendiya Niştimanî/Acans
