Doza kuştina Zarokê Sûrî yê bi navê Ehmed El-Zubî li Libnanê deng veda, piştî ku polîsê Beyrûtê pey ketin, û bû kêşeyek mezin li ser torên civakî di nav Libanî û Sûriyan de, û bû egera pêleke nerazîbûnê ji şêweyê hovane yê polîsên şarederiyê yê ku bû sedema kuştina wî.
Parêzerê Libnanî Tariq Şeneb di tiwêtekê de amaje bi wê yekê kir ku “Zarokê bi navê Ehmed El-Zubî Sûrî ye, û mafên wî hene, û divê dadweriya Libnanê bi erkê xwe rabe, û kesên ev kiryar encam dane bên girtin û dadpirsîn li gel wan bê kirin, û bi tundtirîn siza bêne sizadan”.
Şeneb lêzêde kir”Jibîr nekin, penaberên Sûriyê hatine Libnanê ji ber terora milîşyayên Libanî yên ku çûne wî welatî û ew koçber kirine û zilamên wan kuştine û jinên wan jî revandine”.
Li gor daxuyaniyên xelkê deverê û çalakvanan li ser torên civakî, ew zarokê Sûrî wek boyaxçiyekî debara jiyana xwe dikir, û li kolana Telet El-Xeyad li Beyrûtê kar dikir, da ku alîkariya bavê xwe bike ku ew jî weke etal kar dike, û xwediyê malbatekê ye ji şeş keç û sê kuran pêk tê, û ew her tim rastî peyketina dewriyên polîsên şaredariyê dihat.
Hin çalakvanan ji ser zarê malbata Ehmed veguhestiye, ku hêzên ewlekariyê nehişt ku malbat termê kurê xwe belge bikin, wek hewlekê ji bo veşartina dozê, û polîs bi kuştina wî tometbar kirin, dema ew dehfandin ji wê avahiya ku xwe têde veşartbû, û daxwaza dadpirsînê ligel endamên ewlekariyê yên ku destê wan di vê bûyerê de heye kirin.
Torên civakî asta hêrsa mezin ya çalakvanên mafên mirovan yê Libnanî diyar kirin, ewên ku bi hêrs behsa kiryarên polîsên şaredariya Beyrûtê kirin, herwiha behsa kiryarên wê yên hovane bi giştî li dijî penaberên Sûriyê kirin, ên tijî nijadperestî ne, wek ku ew dibêjin.
Ji aliyê xwe ve, Hevbendiya Niştîmanî ya Hêzên Şoreş û Dijberiya Sûriyê di daxuyanyekê de Doh, daxwaz kir ku lêpirsîneke fermî û zelal di bûyera kuştina zarokê bi navê Ehmed El-Zubî bê kirin, û tevahiya hûrgiliyên wê werin eşkerekirin, û di nava wan de vîdyoyên tomarkirî.
Hevbendiyê di daxuyaniya xwe de tekezî li ser pêwîstiya lêpirsînê di her zêdegaviyekê de kir, ku ji çi aliyekî be, û tevahiya ew kesên ku destê wan di vê bûyerê de hebe, çi bi awayekî rasterast yan nerasterast be bêne sizadan.
Li gor tora BBC malbata zarokê 14 salî û penaberê li Libnanê, piştî sê rojan ji kuştina wî, termê kurê xwe li minwerekê bi awayekî jihevketî dîtine, li yek ji avahiyên kolana Telet El-Xeyat, ku ji qatê şeşemîn yê wê avahiyê ketiye , dema ji ber polis reviyaye.
Berya niha jî her yek ji Komsyona Bilinda Karûbarên Penaberan, û Programa Xwarina Cîhanî, û Rêxistina (UNCEF) ya ser bi Neteweyên Yekgirtî, di dawîtirîn raport de derbarê rewşa penaberên Sûrî li Libnanê, gotin ku di heyama sala 2018an de 69% ji malbatan di jêr xeta hejariyê de dijîn, û hişyarî da ku hîn jî jiyana wan tijî metrsîdarî ye.
Jêder: Hevbendiya Niştîmaniya Sûriyê
