Rêvebera cîbicîkar ya Rêxistina Netewên Yekbûyî “UNICEF”, Henrietta Fore, tekez kir ku zarokên Sûriyê gelek derdeserî di temeneke biçuk de dîtine, ji ber operasyonên leşkerî û dorpêçkirina ji aliyê rejîmê û hevalbendên wê li ser bajar û bajarokên cuda û rastî mirinê hatine.
Roja pêncşemê di konferanseke rojnamevanî de wê diyar kir ku “Hemû zarokên li Sûriyê yên temenê wan heşt sal e, di nava rîsk û tirs û wêranî û mirinê de mezin bûne “, û daxwaz kir ku derfetek bo van zarokan bête dan “Ji bo li dibistanên xwe vegerin û bêne vaksîndan, û hest bi ewlehî û parastinê bikin, herweha divê em karibin alîkariya wan bikin”.
Wê di dawiya serdana xwe ya pênc rojî de ji bo Sûriyê got: “Piştî rakirina dorpêça ku pênc salan berdewam kir li ser çend bajarên Sûriyê, ji nav wan bajarê Dûma yê herî wêrankirî; bi dehan malbat li avahîyên xwe yên heriftî vegeriyane, û ketine di nava rîska bombeyên neteqyayî de yên li her devrê belav in “, wek amajepêkirinekê li ser dorpêça rêjîmê li ser niştecihan û operasyonên leşkerî yên bi çekên qedexekirî.
Wê diyar kir ku asta wêraniyê li Dûma mezin e, bi awayekî ku rêxistineke nefermî NGO ya hevparê UNICEF neçar bû li ser vekirina navendeke tenduristî ya demkî li hewşa mizgefteke wêrankirî li bajêr.
Bal kişand ser ku xelkê parêzgeha Der’a jî zehmetiyên corbecor ji operasyonên leşkerî yên hêzên Esed dibînin, û diyar kir ku “Asta koçberiyê ji parêzgehê gelek bilind e, ku fişareke din têxe li ser xizmetên ku ji berê de kêm in, hevdem ku nîvek ji navendên çavdêriya tenduristî ya destpêkî yên ku 100 navend in, di salên borî de rastî ziyanê hatine “.
Û da xuyakirin ku nêzîkî 1000 dibistanên parêzgehê, bi kêmî pêdiviya nîvê wan bi duberekirina amdekirinê heye, û diyar kir ku polên xwendinê ji zarokan tije dibin ji ber ku zarok ji hînbûnê dûr ketine, jiyê zarokên pola yekemîn ji 6 heta 17 salan e, û hêjî gelek xwendekar ji dibistanan bêpar mane û got ku “Rêjeya dûrketina ji xwendinê li Sûrê digehêje 29%.
Di dawiya axaftina xwe de, daxwaza parastina zarokan li seranserê Sûriyê kir, û bang ji bo zêdekirina karên bihêzkirina pêwendiyên civakî kir, yên hatine helweşandin di salên şer de.
Wê got: ” Nêzîkî 8 salan li ser destpêkirina şer derbas bûne, û hê jî hewcedariyên mezin hene, lê hîn jî bi milyonan zarokên di dema şer de û di nav tundutîjiyê de ji dayik bûne, dixwazin fêr bibin, û bilîzin û birînên wan sax bibin”.
Jêder; Ofîsa Ragihandina Hevbendiya Niştimanî ya Sûriyê