Berdewamiya êrîşên hovane ji aliyê hêzên rejîmê û Rûsya li ser gundewarê Idlib û Hamayê bû sedema koçberbûna bisedhezaran welatiyên sivîl ber bi dever û kampên li ser sînorê Tirkiyê.
Li gorî hin çalakvanên deverê, hêjî kocberî ji gundewarê bakur yê Hamayê dewam dike, bi taybetî jî ji bajar û bajarokên “Keferzêta, Alletamna û Kefrenboda”.
Li gor”Tîma Kordînatorê Bersivdana Sûriyê” , di sê rojên borî de bêtir ji 73 xalan li gundewarên Hama û Idlibê hatine topbarankirin, tevlî ziyanên gihiştin sazî û jêrxana bingehîn, di nav de nexweşxane û xalên pizîşkî, dibistan û kampên penaberan.
Netewên Yekgirtî ji hêla xwe ve êrîşa ji aliyê hêzên Rûsya û hêzên rejîmê li ser gund û bajaran şermezar kiribû, ku dijwartirîn êrîş bû li ser deverên rizgarkirî her ji dema ragihandina peymana Idlibê de.
David Swanson, berdevkê herêmî yê ofîsa karubarê mirovî ya Netewên Yekbûyî, ya navenda wê li A’manê paytexta Urdinê ye, ji ajansa nûçeyan ya almanî re re gotibû: “Em hest bi nîgeraniyek mezin dikin li hember zêdebûna tundutîjiyê li vê dawiyê li bakurê Sûriyê, di nav wan de deverên bêçek yan jî yên nêzîk, û bûn sedema peydabûna koçberiyê û herî kêm wêrankirina sê navendên tendurustiyê”.
Li gorî hin amaran ji aliyê rêxistinên sivîl , hejmara malbatên koçber ji devera bêçek, gihiştiye (300 hezarî) ku herî zêde ber bi kamp û deverên li nêzîkî sînorê Tirkiyê li Idlib û herweha ber bi Efrînê derbider bûne.
Ji aliyê xwe ve, Hevbendiya Niştimanî ya hêzên şoreş û rikberiya Sûriyê tekezî li ser pêwîstiya hewldanên aliyên kartêker di civaka navnetewî de ji bo rizgarkirina welatiyên sivîl kiribû, bi taybetî jin û zarok li gundewarên Idlib û Hamayê, ji bo rawestandina bombebaranê û kocberiya girseyî ya niha li ser erdê dibe, û rê li ber kuştinê bê girtin.
Tê zanîn ku deverên berfireh yên deşta Hema û Idlibê ji aliyê hêzên rejîmê û Rûsya bi balafir û mûşek û topxane her demekê têne bombebarankirin, û bûye sedema kuştin û birîndarbûna hin xelkên sivîl û koçberbûna bihezaran kesên sivîl ji gund û bajarên xwe, tevî ku ew deverên têne topbarankirin dikevin di nava deverên agirbest û peymana Idlibê de.
Jêder: Ofîsa Ragihandina Hevbendiya Niştimanî ya Sûrî
