10 Kadirên Bijîşkî û yên berevaniya sivîl di meha çêriya pêşî de şehîd ketin, bi 44 êrîşên hêzên Rêjîmê û yên dagîrkerên Rûsya li ser bargehên bijîşkî û avahiyên berevaniya sivîl, li gora raporta Tora Sûrî Ya Mafên Mirovan ya doh roja pêncşembê derçûye.
Çalakvanan anî ziman ko firokên rêjîma Esed doh êrîş birin ser bajarê Dûma li gundewarê Şamê, di encamê de sê sivîl hatine kuştin û çend kesên din brîndar bûne. Bêtir gotin ko hêzên Rêjîmê bi bermîlên teqîner yên ko hin ji wan heybera napalma sotandinê di wan de heye, bi ser Kampa Xan Elşîh de li gundewarê Şamê yê rojava de berdane, ya ko di bin dorpêçê de ye û rastî hewildanên têwirdana berdewam ji hêla hêzên Rêjîmê û milîtanên Hizbulaha tirorist tê. Her wiha firokên dagîrkerên Rûsî derdorê Kampê û Zeviyên Elşiyofoniyê û Elreyhan li Xûta rojhilat bi çend êrîşan bombebaran kirin, hin ziyanên madî li deverê kirin.
Toreya Sûrî ya mafên mirovan di raporta xwe de amanckirina hêzên Esed ji 31 bargehên bijîşkî û sê turumbêlên hawarhatina lezgîn û 15 navendên berevaniya sivîl belgeh kirine. Di van êrîşan de 4 karidên berevaniya sivîl û du bijîşk û berdestek û kesekî hawarhetinê şehîd ketine. Her wiha firokên dagîrkerên Rûsî 6 bargehên bijîşkî û heft turumbêlên hawarhatina lezgîn amanc kirine, di encamê de kadirekî bijîşkî şehîd ket.
Toreyê ji Encûmena Ewlekariya Navdewletî daxwaz kir ko pêrabûnan bike tako operasiyonên bêserûber yên ko taxên niştecihan amanc dikin rawestîne, her wiha daxwaz kir ko dosya Sûrî ber bi dadgeha tawankariyên navdewletî bişîne, û kesên ko destê wan di tawankariyan de heye ji nav wan jî rêjîma Rûsya û ya Îranê siza bibin.
Û destnîşan kir ko piraniya êrîşan kesên sivîl û destvala amanc kirine, ko ev kar binpêkirina biryara Encûmena ewlekariyê ya hejmara 2139 û biryara 2254an e, yên êrîş û bombebarana bêserûber qedexe dikin, û her wiha binpêkirina yasaya navdewletî û mafên mirovan e, û digihê asta tawankariyên cengê û yên dijî mirovan, her wiha Toreyê ji Civaka Navdewletî daxwaz kir ko piştgiriya hawarhatinê bo miletê Sûrî pêşkêş bike û wî ji operasiyonên kuştina rojane biparêze û dorpêç ji ser herêmên rizgarkirî rabe.
Hevbendiya Niştimanî ya Hêzên Şoreşê û Rikberiya Sûriyê, berê gotibû ku hewildanên Rêjîmê û Rûsya yên berdewam ên navendên xizmetên giştî bi şêweyekî rêbazkirî û bi mebest amanc dikin, tekez dikin ko ew dixwazin mezintirîn hejmara kuştinê pêk bînin, û dibîne ko sûrbûna Netewên Yekbûyî li ser rola bêberpirsiyarîbûnê di ber van tawankariyan de, dihêle ko ev kuştin û tundrewî li Sûriyê berdewam bibe.
Jêder: Hevbendî
