Çekdarên PYDê wekî hercar berdwamiyê didin kiryarên xwe yên dûrî rewştên mirovan û demokrasiyê, yên di rêurusmên pêşwazî û bixaksipartina cinazeyên şehîdan de dikin, ku çekdarên partiya navhatî careke din astengî xistin pêşiya karwanên hejmarek ji şehîdên pêşmergên “Roj” de, yên li Herêma kurdistanê di dema ji çeperên şer yên li dijî rêxistina DAÎŞa terorîst vedigeriyan şehîd ketin, û navên wan ev in: “mulazimê pile yek şehîd Sîpan Yûsif, şehîd mulazim Sadûn Sîno, û şehîd mulazim Mewlûd Riyad Ehmed, şehîd mulazim Atûf Ebdulah Tahir û şehîd Kamîran Selahdîn Heso”.
Çekdarên PYDê dest bi astengiyan kirin her ji derwazê Sêmalka yê sînorî, dema bi sedan otombêl û cemwer bi dûrahiya 3 km dûr ji Sêmalka rawestandin, û cemawer bi neçarî li ser piyan xwe gihandin karwanê şehîdên xwe.
Paş re çekdaran heta karwanê şehîdan gihişt bajarokê Girkê Legê rengek ji rêzgirtinê dan karwanê şehîdan , lê wan çekdarên PYDê riya bajarokê Çilaxa û Tirbesiyê li pêşiya derbaskirina termên şehîdan girtin û berê karwan dan ber bi otostirada navdewletî, û herwiha piştî bidawîbûna rêweresmên bixaksipartina şehîdan, rabûn bi hilmeteka desteserkirina bi şev û têde ev berêz hatin girtin, berêz Sebah Mela Ebdukerîm endamê encûmena şax ya (PDK-S)ê û Mihemed Emîn Ebdulrezaq û Mihemed Şerîf Yosif û Remezan Ebdulah û Cemîl Koro ji gundê Dêrûna Axê û berêz Yosif Seîd Remo endamê xwecihiya (PDK-S)ê li Girkê Legê yê nesax û bi gorçikekê û berê wî dan leşkeriya kotekî, û berêz Ebdulwehab Kurimî endamê encûmena herêmî ya (PDK-S)ê û Serokê Encûmena xwecihiya ENKSê li Amûdê û berêz Emîn Mihemed ji Xana Serê, herwiha ku hêjî û heta vê gavê bi dehan serkirdeyên ENKSê û çalakvanên siyasî, yên berê hatine girtin di dema pêşwazîkirina termê şehîd Hebîb Qedirî de, hêjî di girtîgehên PYDê de ne.
Hêjayê gotinê ye ku sikirtariya giştî ya ENKSê di daxuyaniyekê de, ev kiryarên çekdarên PYDê yên di derheqê serkirde û kadiroyên Partiya Demokrat kurdistan- Sûriyê û partiyên ENKSê û cemawerê wê de şermezar kirin, û tekez kir ku ev siyaset û kiryarên kirêt û yên dûr ji Kurd û kurdayetiyê, nikarin wê dûr bikin ji erkên wê yên niştimanî û netewî yên li welêt, û daxwaza xistina fişaran li ser (PYD) ji civaka navdewletî û sercem hêzên kurdistanê kir ji bo serbestberdana serkirde û kadiroyên wê û çalakvanên siyasî û sercem girtiyên raderbirînê yên di girtîgehên PYDê de, û dest ji kiryarên xwe yên ne berpirs berde.
Jêder: Hevbendî