Li beyaniya îro roja duşemê 09/11/2015 û li ser vexwendina Encûmena Xwecihî ya ENKSê li bajarê Dêrikê, bihezaran xelkê bajêr derketin li dijî kiryarên PYDê û nemaze ji bona pirotistokirina sepandina rêbazên xwendinê yên îdiyolojîkirî û leşkeriya neçar.
tevî danîna çendîn astengî û rêbendan li ser derwazên bajêr û di nav kolanên wê de ji aliyê çekdarên PYDê û herwiha birîna hêlên telefonê li ser bajêr û qedexekirina dezgehên ragihandinê û gefxwarina li peyamnêr û meydiyakaran, herwiha xwepêşandanek dijber derxistin di heman dem û cih de bi anîna bisedan alîgirên PYDê ji gundan bo acizkirin û torekirina xwepêşandêran û şêwandin û guherîna rengê xwepêşandanê, lewra endamê ENKSê û endamê Lêvegera siyasî Fû’ad Îbrahîm ji bona ku nehêle tevlîhevî û pevçûn di navbera xwepêşender û alîgirên PYDê de çê bibin, ji xwepêşandêran xwest ku vegerin li pêş Nivîsîngeha ENKSê.
Li pêş Ofîsa ENKSê serokê Encûmena Xwecihî Mihemed Elî bavê Nado gotinek pêşkêş kir û têde behsa kiryarên PYDê kir yên bûne sedema zêdekirina dorpêçkirinê li ser miletê Kurd û zêdebûna pêla koçberiyê, û herwiha soz da bi berdewamiya tekoşînê li dijî kiryarên ew aliyê xwe bi hêzê sepandiye û herdem biryarên nerewa dertîne..li dawiyê sipasiya xwepêşandêran kir û daxwaza bidawîkirina xwepêşandanê kir.
Piştî bidawîhatina xwepêşandanê yekser çekdarên PYDê kiryarên lêdan û dûvçûna xwepêşenderan destpê kirin, û hin ji xwepêşenderan girtin û desteserkirin û di nav girtiyan de Mihemed Elî Ebû Nado serokê Xwecihiya Dêrikê û endamê pîlotbîroya Partiya Demokrata Kurdistan- Sûriya û Fû’ad Îbrahîm endamê sikrtariya ENKSê û Azad Cemkarî peyamnêrê kanala Rûdaw û çalakvan Xezwan Şawîş…
Herwiha li roja şembiyê û piştî derketina vexwendina Encûmena Xwecihî ya ji bona xwepêşandanê yekser çekdarên PYDê Mihemed Elî Serokê Encûmena Xwecihî û heryek ji parêzer Besê Evdî û Omer Resûl endamên serkirdayetiya PDK-S bo mawê çend demjimêran girtin.
Hêjayî gotinê ye ku lidarxistina xwepêşandanên sivîl yên aştiyane li çendîn bajar û bajarokên kurdan bi vexwendina ENKSê hatine li dijî sepandina rêbazên xwendinê yên îdiyolojîkirî ji aliyê PYDê.
Jêder: Hevbendî
