Encûmena parêzgeha Hemayê ya azad ya ser bi hikûmeta demî ya Sûrî ve, îro di daxuyaniyekê de, bang li dezgehên navnetewî û rêxistinên mafên mirovan û dewletên garantor kir, da bi erk û karên xwe rabin ji bo rawestandina kampanya hovane ji aliyê hêzên Esed û hevalbendên wê li ser gundewarê Hema û Idlibê.
Encûmenê di daxuyaniya xwe de li ser malpera xwe ya medyaya civakî (Facebook) bang li welatiyên sivîl kir ji bo siba bi xwenîşandanekê rabin bi daxwaza vegera xelkê li ser cih û war û gundên xwe yên rejîma Esed ew bi neçarî jê koçber kirine, û li gor daxuyaniyê ; dagîrkeriya Esed, Rûsya û Îranê vegera wan li ser cih û warên wan red dike.
Encûmenê bal kişand ku operasyonên leşkerî û êrîşa hovane ji aliyê rêjîmê û Rûsya li ser gundên Hema û Idlibê, bi piştgiriya rasterast ji Rûsan, Îranî û milîsên mezhebperist yên wê, tê bi armanca koçberkirina xelkê deverê ji bo wêrankirina dibistan, nexweşxane, navendên parastina sivîl û jêrxana bingehîn.
Encûmenê diyar kir ku bi sedan kes ji şêniyên deverê hatine kuştin û bêhtir ji 500 hezar kesên deverê hatine koçberkirin, di heman demê de bang li hemû alî û hêzên şoreşger kir ji bo nehêlana nakokiyan û yekirina rêzan û parastina deverên rizgarkirî.
Ji aliyê xwe ve, Hevbendiya Niştimanî ya hêzên şoreş û rikberiya Sûriyê, hişyarî dabû ji encamên metirsîdar ên êrîşên berdewam ji aliyê hêzên rejîmê û hevalbendên wê li ser deverên rizgarkirî, û hişyarî dabû ji trajediya mirovî, ji ber êrîşên li ser sivîlan ku heye bibe sedema pêleke mezin ya nû ber bi Ewropayê de.
Hevdem ku trajediya bi hezaran kesên derbider li çol û çolistan û kampên bêseruber hêjî li gundewarê bakur û rojavayê Idlib dimîne, digel berdewamiya hatina malbatên koçber ji gundên Hema û Idlibê, ji encama berdewamiya êrîşên hovane ji aliyê hêzên rejîmê, Rûsya û milîsên mezhebperist li ser deşta herdu parêzgehan.
Jêder: Ofisa Ragihandina Hevbendiya Niştimanî ya Sûrî
