Encûmena Niştimanî ya kurdî, kiryarên kirêt yên dûr ji rewştên demokrasî û mirovî û dûr ji sincên kurdayetiyê yên ku nirxekî mezin didin bi cangorî û şehîdan, û kiryarên girtin û desteserkirina kadiro û serkirdeyên ENKSê şermezar dike.
ENKS’ê tekez kir ku ev kar û kiryarên kîndar, nikarin wê ji xebata netewî û demokrasî ya rojane dûr bixin, heta bidestxistina azadî û demokrasiyê li welat, û herwiha daxwaz ji PYD’ê kir ku dest ji neyartiya ENKS’ê û ji û şêweyê xweferzkirina bi zor û zebrê berde, û vegere zimanê têgihiştin û aştiyê, herwiha daxwaza xistina fişaran li ser PYDê ji civaka navdewletî û ji partiyên kurdistanê kir, ji bona vegera ji siyasetên xwe yên pêrewkirî yên nakevin di xizmeta doza netewî û niştimanî de, û herwiha dibe hokarê têkbirina aştiya navxweyî û civakî li welat.
Herwiha ENKS’ê bang li cemewerê kurd kir ji bona redkirina siyasetên dijî gelê kurd û doza wî ya netewî ya rewa ji aliyê (PYD)ê ve, û daxwaza xwepêşandanên cemawarî li hindur û derveyî welat ji bona redkirin û şermezarkirina van kar û kiryarên dûr ji piransîpên azadî û demokrasiyê.
Hêjayê gotinê ye duhî û di dema bixaksipartina termê şehîd Hebîb Qedrî ji pêşmergeyên rojava yê şehîd bûyî di çeperên Giwêr û Xazir de li dijî terorîstên DAÎŞ’ê li Herêma Kurdistanê, û bi hezaran xelkê kurd derketibûn li ser şeqam û cadeyan bi dirêjahiya riya Sêmalka heta digehêje Qamişlo ji bona pêşwaziya şehîdê pêşmerge, lê ew cemawer û xêliyê cinazê şehîd rastî kiryarên req yên çekdarên PYDê hatin, her ji gundê Xanaserê û heta gund û bajarokên din yên li ser riya Qamişlo, û çekdarên PYDê rê li pêşiya pêşwaziya cinazê şehîd bi rêka rêbendên xwe li ser dezgehên gund û bajaran girtin.
Herwiha termê şehîd bo dema çend demjimêran revandin, û cemawer rastî xeber û dijûnan hatin û çar serkirdeyên PDK-S’ê girtin ji wan: Mihemed Îsmaîl û Neşat Zaza û Ebdulhekîm Hacî û Nafih Ebdulah, tevî çend çalakvan û mediyakaran ji wan: Mizgîn Remezan, Mahir Ehmed û Mihemed Xêr Xelef û Alan Mistefa û Ferhad Hesen, û piştî bidawîhatina rêuresmên bixaksipartinê, du serkirdeyên partiya ‘Yekîtî, berêz Hesen Salih û Ebdulah Gedo hatin girtin.
Jêder: Hevbendî
