Encûmena Niştimanî ya kurd di daxuyaniyekê de bi tundî karên terorî û kiryarên hêrsçêker yên mêlîşiya (PYD)ê di derheq miletê kurd û tevgera wî ya siyasî li Sûriyê dike şermezar kirin, û berpirsayariya encamên xirab yên van kar û reftarên neberpirs xist di Stûyê wan mêlîşiyan de, û tekez kir ku ENKSê dê têkoşîna xwe ya rewa tevî hemû astengiyan berdewam bike.
Dubare ENKSê daxwaz ji PYDê kir ku careke din li siyasetên xwe temaşe bike , û vegere cêbicêkirina rêkeftina Duhokê ya bi çavdêriya Serok Mesûd Barzanî di navbera ENKSê û TEV-DEMê de ji bona yekhelwest û yekrêziya gelê kurd ji aliyê siyasî û meydanî ve.
Daxuyaniyê bal kişand ku hêjî PYDê zêdegaviyên xwe yên bi devê tivingê berdewam dike, bi armanca sepandina zalî û desthilata xwe ya diktatorî –stemkarî, ku bi tekrewî ferman yasayên dijî mafên mirov û dûr ji rewştên kurdewarî derdixe, bo sepandina ajendeyên xwe li ser gelê kurd û tevgera wî ya siyasî û herwiha li ser rêxistinên mafperwer û saziyên civaka sivîl.
Herwiha ENKSê kiryarên PYDê ji bona leşkeriya neçar û revandina keç û kurên kêmî 18 salan û girtin û sergomkirina siyasetmedar û çalakvanan, û ferzkirina bace û xûkiyan ser milet û valakirina navçeyên kurdî ji miletê kurd, hre weha qedexekirina ragihandina azad û girtina navendên saziyên fêrkirinê (yên giştî û taybet û yên bêpere) şermezar kirin, û herwiha şermezarkirina gulebarandina li pêş ofîsa (Osman Sebrî) ya partiya Yekîtî ya kurd li Qamişlo li taxa Kornîş êvara 11-08-2015 ji aliyê hêzên PYDê ve ji otombêleka (Van) ya camên wê fîmkirî; bi armanca belavkirina tirsê û gihandina peyameka merem-naskirî, ku tê di çarçoveya zêdekirina fişaran li ser ENKSê û pêkhateyên wê, nemaze piştî lidarxistina sêyemîn kongirê wê yê ku têde biryarên çarenivîsî hatin standin bi armanca aktîvkirina rola ENKSê û rajeya bercewendiyên doza kurdî li sûriyê.
Jêder:Hevbendî