Cejna Newroza 2017 li piraniya bajar û bajarokên Deverên Kurda tevî astengiyê çekdarên partiya PYD hat vejandin, û xetîra wê hat dadan.
Tevî ku PYD di daxuyaniyeke fermî de vejandina dadana agirê Newrozê qedxekir û hewilda ku xetîra wê vemrîne, lê gelê Kurd li tevaya bajar û bajarokên xwe xetîra Newrozê dadan û li piraniya deveran Newroz vejandin.
Li gor agahiyên peyamnêrê malpera Hevbendiyê li Hesekê yê ku diyar kir ku Newroz li Dêrikê, Girkêlegê, Tirbesipiyê Qamişlo, Amûdê, Dirbêsiyê bi girsayî hat vejandin, û li hin cihan komên Filklorî şano û dîlanên Kurdî pêşkêş kirin, di heman demê de li hin deveran bernameya hin koman bi bihaneya wergirtina rêdanan hat qedexekirin û çekdarên PYD li gundwarê bajarê Qamişlo rê nedan koma Xelat û ya Beyandûr ku bernameyê xwe pêşkêş bike.
Mihemed Şiwêş endamê emandariya giştî ya encumana niştimanî ya kurd li Sûriyê ku beşdarî ahenga gundê Dugirê li gundwarê Amûdê bibû, cejna Newrozê li tevaya gelê Sûriyê û yê kurd pîroz kir û got “Newroz cejneke netewî ye û gelê kurd di bin siha diktatoran ew vejandiye û her û her wê vejîne û guh li keleman nake li ser rêç û rêbaza pakrewanê Newrozê Silêman Adê” .
Şiwêş kiryarên PYD şermezar kirin û ragihand ku diktatoran nikarîbûn xetîra Newrozê vemrîne ji ber ew xetîr sembola hebûna gelê kurde û ew gel wê li ser a berdewamiya dadana wê xetîrê rijd be.
Her weha Li Efrînê, tevî gefên PYD ji ENKS û PDK-S re , bi hezarê welatiyan berê xwe dan devera Meydankê, û Cejna xwe li wir bi kêf û xweşî vejandin, lê çekdarên PYD şano û pêşkêşkirina gotinan qedexe kirin.
Tê zanîn kû desteya siyasî ya hevbendiya niştimanî ya hêzên şoreş û rikberiya sûriyê û encumena niştimanî ya kurd li Sûriyê di du nameyên cuda de Cejna Newrozê Li gelê Sûrî û bi taybet gelê Kurd pîroz kirin.
Jêder: Beşê Kurdî Ji Nivîsgeha Ragihandinê Ya Hevbendiyê