“Koma Kar Ji Bo Filestîniyên Sûrî” di raporta xwe ya duhî de diyar kir ko hêzên ewlehiya rêjîma Esed çarenivîsa bêtir ji 108 jinên girtî yên filestînî ji destpêka şoreşê ve heta nuha diyar nakin, û bal kişand ser ko çi pêzanîn li ser rewşa wan an cihê girtina wan nîn e.
Tîma belgehkirinê aşkere kir ko hejmara girtiyên filestînî gihaye 1727ê, destnîşan kir ko temenê girtiyên jin corbicor in, zarok û jinên bi temen jî hene, bal kişand ser ko xwendekarên zanko û peymangehan û yên dibistanên amadeyî hene, û hin ji wan dayik in, û hinên din gava hatin girtin ducanî bûn.
Raporta tîmê got ko wan karîbû kuştina 35 penaberên jin bi êşkenceyê di zindanên Esed heta kêlîka amadekirina vê raportê belgeh bikin, lê serjimara dawî ya qurbaniyên filestînî 565 penaber in, zarok û kalemêr jî di nav wan de hene.
Komê li ser malpera xwe ya fermî îro şemiyê anî ziman ko hêzên ewlehiya rêjîmê hêj penabera filestînî Rudeyne Mihemed Xetab ya 29salî piştî girtina wê sala 2012ê heta nuha veşartiye, Rudeyne ji niştecihên Laziqiyê ye.
Çend çalakvanan bang li rêxistinên mafnasiyê û desteyên navdewletî û Onrawa û balyozxaneya filestînî li Şamê kirin, ji bo çarenivîsa wê aşkere bibe, û kar bikin ji bo wê û hemû girtiyan serbest berdin.
Rêjîma Esed kaxezên bi dehan ji qurbaniyên êşkenceyê dane mirovên wan, bê ko xelkên wan wêribin devê xwe vekin û navên wan bêjin ji tirsa rêjîmê, her weha dîdevaniya kesên ko hatine berdan tekez kir ko penaberên filestînî bi êşkenceyê jiyana xwe jidest dane, bê ko karibin navên wan bêjin.
Tîma belgehkirinê ya koma kar tekez kir ko hejmara girtiyan û yên di zindanan de hatine kuştin bêtir in ji yên ko hatine belgehkirin, ji ber rêjîm vedişêre, û tirsa xelkên girtiyan ko nikarin agahiyan bidin.
Tête destnîşankirin ko dîdevaniya yên hatine berdan tekez dike ko endamên ewlehiyê hemû cûreyên êşkenceyê dijî girtiyan bikar tanîn, wek dîdevaniya girtiya jin ya bi navê Huda, ya hûrbînî derbarê sosretên tanîn serê jinên girtî di zindanên rêjîma Esed eşkere kirin.
Jêder: Ogêsa Ragehandinê ya Hevbendiya Niştimanî
