Oparesyonên hovane ji aliyê hêzên rejîmê û Rûsya li ser gundewarên Idlib û Hemayê berdewam in, û bûne sedema kuştina pitir ji 300 welatiyên sivîl, û koçberbûna bi sedhezaran kes ber bi kamp û deverên nêzîkî sînorên Tirkiyê de, bi rêya kampayanyeke leşkerî ya hovane berovajî peymana Idlibê ya îmzekirî ji bo agirbestê li deverê.
Tîma Kordînatorên Bersivdanê li Sûriyê, duhî roja duşemê di daxuyaniyekê de ragihand ku tîmên wê kuştina zêdetir ji 364 welatiyên sivîl li deverên topbarana esmanî û bejayî belge kirine, tevî belgekirina hejmara kesên ji topbarana bêseruber direvin.
Daxuyaniyê bal kişandiye li ser hejmara qurbaniyên sivîl yên her ji destpêkirina kampanya leşkerî ya hêzên rejîm û Rûsyayê ji 2’ê reşemhê heta 6’ê gulanê, ku gihîştiye zêdetir ji 364 welatiyên sivîl, 261 ji wan li parêzgeha Idlibê ne, di nav de 92 zarok , û 93 kesên sivîl li parêzgeha Hema, di nav de 22 zarok, û heşt kesên sivîl, di nav de sê zarok li parêzgeha Helebê, û 2 li parêzgeha Latikiyê.
Daxuyaniyê diyar kiriye ku çend gund û bajarok rastî êrîşên bejayî hatine, ku ew êrîş li ser zêdetir ji 88 xalan hatine pêkanîn, li Idlib li ser 34 xalan, û 42 xal li parêzgeha Hema, û 9 xal li parêzgeha Helebê, û 4 xal li parêzgeha Latikiyê.
Daxuyaniyê bal kişandiye ku zêdetir ji 89 xalan li gund û bajarokan ji aliyê balafirên şer hatine topbaran kirin, 39 xal li parêzgeha Idlib, û 46 xal li parêzgeha Hema, û 2 li parêzgeha Helebê, û 2 li parêzgeha Latikiyê, û eşkere kiriye ku bi rêya helîkopteran zêdetir ji 49 xalan hatine topbarankirin, ji wan 22 xal li parêzgeha Idlib, û 27 xal li parêzgeha Hemayê.
Tîmê di daxuyaniya xwe de, tevaya hejmara kesên derbider ji 2’ê reşemehê û heta 6’ê gulanê, bi zêdetir ji 51 022 malbatan piştrast kiriye, bi qasî (317 868 kes), ku li ser du qonaxan hatine belavkirin, qonaxa yekê ji 2’ê reşemehê heta 28’ê nîsan ye ku têde 34 403 malbat koçber bûne, bi qasî (214 329 kes), û qonaxa duyem ji 29 nîsanê heta 6’ê gulanê ye, 16 619 malbat bi qasî (103 539) kesan.
Tîmê di daxuyaniya xwe de bang li rêxistinên mafên mirovan yên herêmî û navnetewî û ofîs û ajansên Netewên Yekbûyî kiriye ji bo şermezarkirina vê êrîşa leşkerî ya ji aliyê Rûsya û hêzên rejimê, ji ber binpêkirinek eşkere ye ji yasa mirovîn ya navnetewî û yasa navnetewî û mafên microvan re, û herwiha berovajî hewldanên aştiyê ne yên li herêmê dibin ji bo bicihkirina agirbestê û deverên bêçek.
Hevbendiya Niştimanî ya Hêzên Şoreş û rikberiya Sûriyê jî di daxuyaniyeke xwe de, dakokî li ser pêwîstiya ku aliyê kartêker bi erkê xwe rabin, ji bo rizgarkirina welatiyên sivîl, bi taybetî jin û zarok li Idlib û Hemayê, û rawestandina bombebarankirinê û koçberiya girseyî ya niha li ser erdê dibe, û rawestindina kuştina xelkekî zêdetir.
Gund û bajarokên herdu parêzgehên Idlib û Hema, rastî bombebarana esmanî bi top û mûşekan ji aliyê hêzên rejîmê û Rûsya dibin, û bûye sedema kuştin û birîndarbûna xelkên sivîl û koçberbûna bi hezaran xelkê wan gund û bajaran ji ber topbarana bêserûber, tevî ku dever dikeve di bin sîbera peymana Idlibê ya ji bo rawestandina topbarana li ser deverê.
Jêder: Ofîsa Ragihandina Hevbendiya Niştimanî ya Sûrî
