Nûnerayetiya Encûmena xwecihî ya ENKS’ê li Ewropa, ya Berlîn û Almaniya rojhilat, di 9’ê gulanê de bi lidarxistina maseya girover li bajarê Berlînê rabû, bi amadebûna hin kesayetiyên kurdperwerên serbixwe, û di destpêkê de, berêz Rêzan Şêxmûs, serokê nûnerayetiya ENKS’ê li Ewropa bi kurtî li ser giringiya vê hevdîtinê axivî ji bona lêgerîn û gengeşekirin û dîtina mîkanizim û rêkarên cidî ji bona pêşxistin û çalakkirina Encûmenên xwecihî li sercem dewletên Ewropa, herwiha li ser giringiya lidarxistina van civînan axivî, ji bona bijartina kesayetiyên niştimanperwer yên serbixwe di beşdarîkirina dezgehên ENKS’ê de li Ewropa, bi rêka lidarxistina konfiransên xwecihî di van dewletan de û rola pêwîst ya kesayetiyên serbixwe yên kurd di encûmenên xwecihî de diyar kir.
Di hevdîtinê de gelek nêrîn û boçûn hatin gengeşekirin, û amadebûyan gelek têbînî pêşkêş kirin li ser karê Encûmê li hundur û derveyî welêt, derbarê nikarîna wê bi awayrkî giştî ku hevdem be digel bûyeran, û herwiha nekarîna wê ya peydakirina kadiroyên siyasî û yên rojnamevanî û yasanas ku hevşan be digel şanda ENKS’ê di danustandinên Jinêv de, herwiha gelek têbînî li ser kêmûkurtiyên ENKS’ê li Ewropa pêşkêş kirin, nemaze di warê guhdana bi penaberên kurd û giringiya dîtina mîkanizmên giring bo pêwendiyan digel wan, nemaze bi nifşê ciwanan re yên ji welat koçber bûne ji ber kiryarên (PYD)ê.
Herwiha çendîn pêşniyar pêşkêş kirin ji bona pêşxistina ENKS’ê li Ewropa, û giringiya pêwendiyan digel rêxistinên mafnas û diblomatkarên Ewropa ji bona şirovekirina doza kurdî, û herwiha şiyanên dîtina lobîkî kurdan da bandorê li ser dewletên Ewropa bike, ji bona piştgiriya doza kurdî li Sûriyê û giringiya dîtina çareseriyekê jê re.
Jêder: Nûnerayetiya ENKS’ê li Ewropa
