Pirogramê Netewên Yekgirtî yê geşepêdanê di raporta xwe ya dawî de diyar kir ko 70% ji miletê Sûrî ava vexwarinê bi şêweyek rêkûpêk bi dest wan nakeve, bi sedema wêranbûna jêrxana bingehîn ya mirovî ji hêla rêjîma Esed û Rûsya ve, û vê yekê hişt av pir bête birîn.
Raportê got ku bo dabînkirina ava vexwarinê ji her kesî re bi buhayekî pejirandî; giring e pirojeyên weberhênanê di warê jêrxanê de çêbibin, û cihên avrêjê dabîn bikin, û navtêdana paqijiyê bikin, û ev kar çend sal jê re divên, çimkî jêrxana Sûriyê pir wêran bûye.
Raportê diyar kir ko herêma erebî ya herî bêtir derdê nebûna ewlehiya avê dîtiye, û tekez kir ko ji nav 20 welatên ko zehmetiya kêmbûna avê dibînin; 14 welat ji wan yên erebî ne, para her takekesekî nagehêje 12% ji para kesên cîhanê.
Derbarê kêmbûna avê li Sûriyê encûmena parêzgeha Hema ya azad û encûmena xwecihî ya navçeya Eqêrebat li navîka Sûriyê di 11 Eylûla bûrî, bang li rêkxistinên mirovî kir bo alîkariya 342 malbatên hewcedarî alîkariyê li kampên başûrê Idlibê bikin.
Pisporekî ji rêkxistina Netewên yekgirtî ya zarokîniyê (UNISEF) di 17 tebaxa par de got ku rêjîma Esed ava vexwarinê li dijî miletê Sûrî wekû çekekî bikar tîne, û pisporê Nimsawî Endiryas Kinab, birêveberê beşê dabînkirina avê yê rêkxistinê got: ‘’ Hin herêman tihnî dikin, bi riya şikandina boriyên avê li wan deveran, ko 30 operasiyonên qutkirina avê ji sala 2016ê hatine tomarkirin. ‘’
Komîta lêkolîna navdewlewtî ya serbixwe ya bi ser Netewên Yekgirtî ve, di raporta meha adara par dibîne, bombebarana rêjîmê ji Eyn Elfîcê re li gundewarê Şamê tawankariyên cengê ne.
Destnîşan kir ko toreyên avê û piran û jêderên avê di salên bûrî de ketin ber wêraniyeke rêbazkirî ji hêla Rûsya û rêjîmê, bi wan karan piraniya jêrxana vê karta tendiristî wêran bû, û bû sedema ko beşekî mezin jê ji xizmetê derket, hem jî rêjîm avê wek çek li dijî miletê Sûrî li herêmên derveyî kontrola wê bikar tîne.
Jêder: Ofêsa ragehandinê ya Hevbendiya Niştimanî