Rêkxistina Netewên Yekgirtî ya Zaroktiyê (Unisef) hişyarî ji pirbûna rewşên mirina zarokan li kampa Elrikban da, û got ko ew rêjeyeke metirsîdar e, ji ber ji destpêka salê ve heta nuha her pênc rojan zarokek dimire.
Rêkxistinê di daxuyaniyeke xwe de duhî çarşembê got û tekez kir ko 12 zarok, 5 ji wan şîrmij bûn, li kampa Elrikban ya nêzîk sînorê Urdinê, bi sedema kêmbûna guhdana tendiristî û sermayê mirin.
Xeyret Kabalarî birêvebera herêmî ya Unisef ya rojhelata navîn û bakurê Efrîka got: ‘’ Tev li hişyariyên dubarekirî, hejmara mirina zarokan li Elrikban berdewam bêtir dibe, bi rêjeyekê metirsîdar ko her pênc rojan zarokek dimire. ‘’
Birêvebera herêmî ya rêkxistinê destnîşan kir ko ‘’ Elrikban bi rewşa xwe ya têkçûyî ne cihekî guncav e bo zayîn û mezinbûna zarokan, tev li bizavên ko ji hêla civata mirovînî ve di rewşên awarte de dibin.‘’
Unisef di 15ê çileyê paşî yê bûrî de, anîbû ziman ko bi sedema sermayê 15 zarokên derbider piraniya wan şîrmij in, li kampan û ser riyên derbideriyê mirine.
Li Kampê dora 175 zarokan bi sedema kêmxwariniyê di heyva bûrî de nexweş ketine, û hejmarek zarok bi sedema kêmbûna derman û guhdana bijîşkî mirine, her weha bi dehan bi bînçikînê mirine, bi sedema barîna bahozeke toz û qûmê.
Unisef daxwaz ji hemû aliyan kir ko rewşa zarokan deynin ber çavên xwe û çareseriyên herdemî û bilez bibînin, tako derdê bi salan ko zarokan ji neçarî dîtine bidawî bikin.
Vê dawiyê rêjîma Esed û Rûsya rêkên alîkariyên mirovî yên kampê girtine û Hevbendiya Niştimanî ya Hêzên Şoreşê û Rikberiya Sûriyê dibîne ko dorpêçkirin şerekî din e, û destnîşan kir ko ew dixwazin viyana wan têk bidin û wan ber bi çarenivîseke nediyar de koçber bikin.
Û got ku operasiyona dorpêçkirinê rê li ber ‘’Qirkirinekê li pêşberî çavên cîhanê vedike.‘’ û ji civaka navdewletî bi giştî û ji rêkxistinên mirovî bi taybetî daxwaz kir ko bizavê bêtir bikin tako derdkêşiya niştecihên kampê bidawî bikin, û jidil kar bikin bo rizgarkirina zarokan û zarokîniya binpê bûye li kampên dorpêçkirî ji hêla rêjîma Esed ve.
Hêzên rêjîma Esed di 4ê çêriya pêşî de dorpêçeke tund dane ser kampa Elrikban, û nehiştine heyber û keresteyên xwarinê û yên bijîşkî derbasî kampê bibin, tevlî bangên hewarhatinê ji hêla rêvebiriya kampê ve, bo gihandina alîkariyê bo bêtir ji 50 hezar kesên di rewşine mirovî yên pir dijwar de dijîn.
Jêder: Ofêsa Ragehandinê ya Hevbendiya Niştimanî