Bi amadebûneke diblomasî û nûnerîtiyeke navdewletî ya fermî, doh çarşembê 08.03.2017ê Nivîsgeha Encûmena Niştimanî Kurdî li Berlînê ji aliyê şanda Encûmena Niştimanî Kurdî hate vekirin. Şande ji Ibrahîm Biro serokê Encûmena Niştimanî Kurdî û Kamîran Haco serokê nivîsgeha peywendiyan û Siyamend Haco endamê nivîsgeha peywendiyan û Rêzan Şêxmûs serokê nûnerîtiya Ewropa ya Encûmena Niştimanî Ya Kurd pêkhat.
Li ahenga vekirinê birêz Endiryas Kiroger nûnerê wezareta derve ya Elmanî û nûnerê balyozxana Emerîkî li Berlînê û birêz Dilşad Barzanî nûnerê desthilata herêma Kurdistanê li Elmanya û nûnerê balyozxana Ferensî û Dr. Besam Ebdulah balyozê Hevbendiya Niştimanî Sûrî li Elmanya û Riyad Sêf endamê Hevbendiya Niştimanî Sûrî û kesayetiyên opozisyonê yên Kurd û Ereb û Aşûrî lê amade bûn.
Birêz Biro û Kamîran Haco axivîn û spasiya wezareta derve ya Elmanî li ser alîkariya wan di vekirina nivîsgehê de kirin, û gotin ku berê jî di vekirina nivîsgeha Encûmenê li Cinêvê Almanya alîkarî kirine. Û herdu li ser giringiya vekirina van nivîsgehan axivîn û behsa seredana şanda Encûmena Niştimanî Kurdî ya Waşintonê û hevdîtinên wan yên ko pêkanîne kirin.
Birêz Endiryas Kiroger, û ew jî berpirsiyarekî bilind e di wezareta derve ya Elmanî de û taybetmendê dosya rojhilata navîn e, yê Sûriya, Libnan û Urdinê û dosya şerê Daişê, di beşdarbûna xwe de gava şerîta vekirinê birrî ji serokê Encûmenê re got ku ezê vê şirîta sor li dev xwe bihêlim bi hêvî me ew roj bê û Sûriya bibe dîmuqratî û nivîsgeha Encûmena Niştimanî Ya Kurdî li Şamê vebe.
Piştî bidawîkirina ahenga vekirina nivîsgehê, Şanda Encûmena Niştimanî Kurdî simînareke siyasî bi amadebûna xelkên Sûriyê li Elmanya li dar xist, ji bo ronîkirina seredana şanda Encûmena Niştimanî ya Waşitonê.
Jêder: Nivîsgeha Ragihandina Hevbendiya Niştimanî
