Herdû rojên çarşem û pêncşemê, mamoste û xwendekarên bajarê Kobanê û malbatên xwendekaran xwepêşandan lidar xistin, û têde daxwaza dana destûrê ji bo xwendina rêbazên ku danpêdan bi wan heye kirin, lê hêzên PYD xwepêşandan ji hev belav kirin û hin ji beşdaran girtin.
Kenala Rudaw hevdîtin li gel mamoste Ednan Bozan yê ku di xwepêşandanê de beşdar bû û hatibû girtin jî pêk anî, û Rudaw got ku hejmarek mezin a ku nêzî sê hezar xwendekar heye naxwazin rêbazên PYD bixwînin, û nerazîbûna xwe ji şêweyê danûstandina rêveberiya wan bi vê mijarê re diyar dikin.
Bozan ragihand ku Asayiş her çend rojan mamosteyan digirin û daxwaza imzakirina kaxezekê ji wan dikin ku ew nema waneyên taybet bi rêbazên xwendinê yên dewleta sûriyê bidin, û wî nerazîbûna malbatên xwendekaran veguhest derbarê xwendina bi rêbazên PYD yên ku danpêdan bi wan tune ye.
Tê zanîn ku beşekî mezin ji xelkê Kobanê dixwaze pêşerojeke diyar û serkeftî ji zarokên xwe re dabîn bikin û wan di dibistanên ku rêbaza rijêmê ya ku danpêdana navdewletî pê heye bidin xwendin, ji ber ku rêbaza Rêvebiriya Xweser ne fermî ye û ayindeya zarokên wan di metirsiyê de dimîne, û welatiyên Kobanê tekez dikin ku nepejrandina rêbaza PYD ji aliyê wan ve nayê wateya ku ew dijî zimanê kurdî ne, lê sedem ew e ku tu pêşeroj li pêşiya rêbaza PYDê yaku danpêdana navdewletî pê nehatiye kirin tune ye.
