Bi dehan xelk û kesên koçber li gundewarê Heleb û ldlibê, duh xwenîşandan li dar xistin ji bo şermezarkirina bombebarana ji hêla rejîma Esed û Rûsya ve û kampanya leşkerî ya ji nîsana borî ve li dijî deverên kêmkirina zêdegaviyan li bakurê Sûrîyê.
Çalakvanan ragihand ku bi dehan ji şêniyên bajarokê El-Bab û koçberên ji deverên din, di hewşa mizgefta Fatima el-Zahra de kom bûn, ji bo şermezarkirina gulebarana hêzên rejîmê li ser bajar û bajarokên Idlib û Hemayê.
Wan çalakvanan got ku bi dehan kes li bajarokên “Sico” û “Kilcibrîn” li gundewarên bakurê Helebê li dijî kampanya qirêj ya li dijî deverên rizgarkirî derketin, û “bêdengiya navdewletî” ya li ser komkujiyên li dijî sivîlan şermezar kirin.
Xwepêşanderan piştevaniya xwe ya berdewam ji bo Artêşa Azad ya Sûrî anîn ziman, bi rêya bilindkirina pankartan mîna “artêşa azad parêzvanê erd û şerefê ye”, “deriyê mal û depoyên xwe ji bo koçberên Idlibê vekin”, “dê şoreş berdewam be heta henasa dawiyê”, “şerê Idlibê şerê hemû şervanên deverên rizgarbûyî ye”, û zêdebarî hin pankartên din yên sloganên rûxandina rejîmê.
Herweha bi dehan şêniyên bajarê Idlib li meydana “Sebeh Behrat” xwenîşandanek bi bilindkirina ala şoreşê lidar xistin, bi sloganên piştevaniyê ligel bajarên “Mi’ret al-Ni’hman”, “Xanşîxon”, “Kefr Nibl” û gundên nêzîk yên ji hêla hêzên rêjîmê û Rûsyayê têne topbarankirin.
Hevdem ku hêjî rejîma Esed û Rûsya di kampanya xwe ya leşkerî ya asmanî û bejekî de ya ji heyva nîsanê ve berdewam in, ku bûye sedema koçberbûna bi sedhezaran welatiyên sivîl ji gund û bajarokên xwe, ku deverên ji hêla hêzên rêjîmê ve hatune kontrolkirin bi tevahî vala bûne ji xelkê xwe, herweha bûye sedema kuştin û birîndarbûna bi sedan welatiyên sivîl û xirakirina mal, nexweşxane û dibistanan.
Jêder: Ofîsa Ragihandina Niştimanî Sûrî
